بە ڕشاندن ڕێگری لە بڵاوبوونەوەی تای خوێنبەربوون دەکرێت

ئاڤا نیوز 

وەزیری تەندروستی حکومەتی هەرێمی کوردستان ڕایگەیاند، ڕشاندنی زۆر بۆ کێڵگەکان کراوە، بۆیە حاڵەتەکانی تای خوێنبەربوون لە هەرێمی کوردستان کەمترە.

بۆچی گرنگە: لە جەژنی قوربان نزیک دەبینەوە و موسوڵمانان بە مەبەستی قوربانیکردن ئاژەڵ دەکڕن.

لێدوانی فەرمی: د.سامان بەرزنجی، وەزیری تەندروستی، بە ئاڤا نیوزی ڕاگەیاند: نەخۆشی تای خوێنبەربوون لەژێر کۆنترۆڵدایە، بۆ ئەو مەبەستەش کۆبوونەوەی هاوبەش لەگەڵ وەزارەتی کشتوکاڵ کراوە و کۆنووس و کۆمەڵێک ڕێکار و بڕیارمان واژۆ کردووە، ڕێنمایی بە هەموو پارێزگا و ئیدارە سەربەخۆکان دراوە تا نەخۆشی تای خوێنبەربوون کۆنترۆڵ بکرێت، ئەمساڵیش ڕشاندنی زۆر کراوە بۆیە حاڵەتمان کەمە.

ئەوەی پێویستە بیزانیت: 60 حاڵەتی نەخۆشی تای خوێنبەربوون لە عێراق هەبووە و هەشت لەوانە گیانیان لە دەست داوە، لە هەرێمی کوردستانیش دوو حاڵەتی نەخۆشییەکە هەبووە.

هۆکارە زانراوەکان: نەخۆشی تای خوێنبەربوون لە گەنەی ئاژەڵەوە بۆ مرۆڤ دەگوازرێتەوە.