بە بڕیاری سەرۆکوەزیران بارزانی یاریگای فەرەنسۆ هەریری نۆژەن دەکرێتەوە

ئاڤا نیوز

لە سەر فەرمانی سەرۆکوەزیران بارزانی، بە گوژمەی یەک ملیار و 700 ملیۆن دینار یاریگەی فەڕەنسۆ هەریری هەولێر نۆژەن دەکرێتەوە.

ڕاگەیێنراوی فەرمی: ئومێد خۆشناو، پارێزگاری هەولێر ڕایگەیاند: لە سەر فەرمانی سەرۆکوەزیران بارزانی، ڕەزامەندی درا بە تەرخانکردن و خەرجکردنی گوژمەی (یەک ملیار و700 ملیۆن دینار بەشێوەی نەختینە و قۆناغ لە سەر بودجەی پەرەپێدانی پارێزگای هەولێر بۆ جێبەجێکردنی پڕۆژەی گۆڕینی چیمەن و نۆژەنکردنەوەی یاریگەی نێودەوڵەتی شەهید "فەڕەنسۆ هەریری". 

زانیاریی زیاتر: دوای کۆتاهاتنی خولی نایابی عێراقی ئەمساڵ، ڕاستەوخۆ دەست بە جێبەجێکردنی پڕۆژەکە دەکرێت.

ئەوەی پێویستە بیزانیت: لە 18ی شوباتی ئەمساڵ و لە یادی 23 ساڵەی شەهید "فەرەنسۆ هەریری"، بڕیاردرا دەست بە نۆژەنکردنەوەی یاریگاکە بکرێت، ئێستا دیاری سەرۆکوەزیران بارزانی، بۆ یانەی هەولێر ڕەزامەندی لەسەر دراوە.

ئەمەش بزانە: یاریگەی "شەهید فەڕەنسۆ ھەریری" یاریگایەکی نێودەوڵەتی یانەی ھەولێرە و بەدووەم گەورەترین یاریگای وەرزشی دادەنرێت لە عێراق، لە ساڵی 1956 لەگەڵ دروستبوونی یانەی ھەولێر دروستکراوە.