مژدەیەک لە سەرۆکوەزیران بارزانییەوە بۆ وەرزشدۆستانی هەولێر: یاریگای فڕەنسۆ هەریری نۆژەن دەکەینەوە

ئاڤا نیوز 

 

لەسەر فەرمانی سەرۆکوەزیران بارزانی یاریگەی فڕەنسۆ هەریریی هەولێر نۆژەن دەکرێتەوە و سەرۆکی یانەی هەولێریش بڕیارەکە بە هەنگاوێکی زۆر گرنگ وەسف دەکات.

 

وێنە گەورەکە: شەوی ڕابردوو لە کەرنەڤاڵە وەرزشییەکەی ئاڤا  و کۆکردنەوەی هەزاران گەنج لە شەقامی ئیسکان، چێنەر عەبدولقادر مژدەیەکی لە زاری سەرۆکوەزیران بارزانییەوە بە وەرزشدۆستانی شاری هەولێر دا و ڕایگەیاند: لەسەر فەرمانی سەرۆکوەزیران بارزانی یاریگەی شەهید فڕەنسۆ هەریری نۆژەن دەکرێتەوە.

 
لێدوانی فەرمی: ئومێد خۆشناو، پارێزگاری هەولێر بە ئاڤا نیوزی ڕایگەیاند: لەسەر فەرمانی سەرۆکوەزیران بارزانی، بەگوژمەی یەک ملیار و 700 ملیۆن دینار و بەشێوەی نەختێنە و قۆناغ، دەست بە پڕۆژەی گۆڕینی چیمەن و نۆژەنکردنەوەی یاریگەی نێودەوڵەتیی شەهید فەڕەنسۆ هەریری دەکرێت.

 

لەلایەکی دیکەوە: موئەیەد مەغدید، سەرۆکی یانەی هەولێر بە ئاڤا نیوزی گوت: ئەم بڕیارەی سەرۆکوەزیران بارزانی هەنگاوێکی زۆر گرنگە و دڵخۆشکەرە بۆ هاندەران و یانەکە، دوای نۆژەنکردنەوە دەچێتە قۆناغی ستانداردە نێودەوڵەتییەکان.

 

زانیاریی زیاتر: دوای کۆتاییهاتنی خولی نایابی عێراقی ئەمساڵ، ڕاستەوخۆ دەست بە جێبەجێکردنی پڕۆژەکە دەکرێت.

 

ئەوەی پێویستە بیزانیت: یاریگەی فەڕەنسۆ ھەریری یاریگەی یانەی ھەولێرە و بە دووەم گەورەترین یاریگەی وەرزشی دادەنرێت لە عێراق، لە ساڵی 1956 لەگەڵ دروستبوونی یانەی ھەولێر دروستکراوە.