نێچیرڤان بارزانی ستایشی ڕۆڵی سەرۆکوەزیران بارزانی بۆ لێکتێگەیشتن لەگەڵ بەغدا دەکات

ئاڤا نیوز

 

سەرۆکی هەرێمی کوردستان، ستایشی ڕۆڵی سەرۆکوەزیران بارزانی بۆ لێکتێگەیشتن لەگەڵ بەغدا کرد و بەڵێنی بەردەوامیی هەموو هاوکاریی و پشتگیرییەکیشی بۆ هەوڵەکانی دووپات کردەوە.

 

وێنە گەورەکە: ئێوارەی ڕۆژی یەکشەممە 2-6-2024، بە ئامادەبوونی سەرۆکی هەرێمی کوردستان، سەرۆککۆماری عێراق و سەرۆکوەزیران بارزانی، شەشەمین خولی دەرچووانی زانکۆی ئەمریکی لە دهۆک بەڕێوەچوو.

 

لێدوانی فەرمی: لە میانی ڕێوڕەسمەکەدا سەرۆکی هەرێمی کوردستان گوتارێکی پێشکەشکرد و لە بەشێکی گوتارەکەی ئاماژەی بەو لێکتێگەیشتنە کرد کە لەگەڵ حکومەتی فیدراڵ هەیە بۆ چارەسەرکردنی کێشەکان و ڕایگەیاند: سوپاسی ڕۆڵی سەرۆکوەزیرانی فیدراڵی عێراق بەڕێز سوودانی و سەرکردەو لایەنە عێراقییەکان دەکەین کە لەمبارەیەوە هاوکارن، هەروەها دەستخۆشی لە سەرۆکوەزیران بەڕێز مەسرور بارزانی و حکومەتی هەرێمی کوردستان دەکەم بۆ لێکتێگەیشتن لەگەڵ بەغدا و هەموو هاوکاریی و پشتگیرییەکیش بۆ هەوڵەکانیان لەلایەن ئێمەوە بەردەوام دەبێت.

 

زانیاریی زیاتر: نێچیرڤان بارزانی ڕایگەیاند: ئێمە چارەسەرکردنی کێشەکان لەگەڵ بەغدا دووپات دەکەینەوە، خۆشحاڵم بە بەرەوپێشچوونی پەیوەندییەکانی هەولێر و بەغدا، هیوای بەردەوامی و چارەسەرکردنی یەکجارەکی هەموو کێشەکان دەخوازم.

 

لەلایەکی دیکەوە: نێچیرڤان بارزانی پیرۆزبایی لە دەرچووانی زانکۆکەکرد وهاوکات ڕایگەیاند: پیرۆزباییەکی گەرم لە بەرنامەی سەرۆکوەزیرانی حکومەتی هەرێمی کوردستان بەڕێز کاک مەسرور دەکەم بۆ پێشخستنی سیستمی پەروەردەو فێرکردن و خوێندنی باڵا لە هەرێمی کوردستاندا.