لە هەرێمی کوردستان قەرز و پێشینە بە فەرمانبەران و هاونیشتمانیان دەدرێت

ئاڤا دیجیتاڵ

 

یەکەم بانکی نیشتمانی له‌ هه‌رێمی كوردستان بە سەرمایەى 250 ملیار دینار دادەمەزرێت و یەکێک لە خزمەتگوزارییە سەرەکییەکانی پێدانی قەرز و پێشینەیە به‌ هاووڵاتیان و فەرمانبەران. 

 

وێنه‌ گه‌وره‌كه‌: ئەم مانگە لە هەرێمی کوردستان بانکێکی نوێی حکومی بە ناوی بانکی نیشتمان ده‌كرێته‌وه‌. بانکەکە ڕاستەوخۆ سەر بە بانکی ناوەندیی عێراق دەبێت و بە سیستمێکی پێشکەوتوو کاردەکات. بەئەلیکترۆنیکردنی سیستمی دارایی لە کارە سەرەتاکانی دەبێت.  هاوکات دەتوانێت دۆلار بۆ بازاڕەکانی دراوی کوردستان دابین بکات. هاندەرێکیشە بۆ ئەوەی سیستمی بانکی لە هەرێمی کوردستان هاوچەرخ و باوەڕپێکراو بێت، برەویش بە کەرتی بازرگانی دەدات.

 

بۆچی گرنگه‌: پێدانی قەرزو پێشینە بە هاونیشتمانیان کاریگەری دەبێت لەسەر گەشپێدانی پرۆژە ئابوورییە بچووکەکان و رەخساندنی هەلی کار بۆ گەنجان، هاوکات پڕکردنەوەی ئەو بۆشاییەی کە بانکەکانی عێراق لە هەرێمی کوردستان دروستیان کردووە.

بانكی ناوەندیی عێراق لەدوای ساڵی 2003 ەوە چەندین قەرز و پێشینەی جیاواز بە فەرمانبەران و هاووڵاتیان دەدات، بەڵام هاونیشتمانیانی هەرێمی کوردستانی لێی بێبەش بوون. لەگەڵ کردنەوەی بانکی نیشتمان ئەم قەرز و پێشینانە  هاوشێوەی شارەکانی ناوەڕاست و باشووری عێراق بەردەست دەبن کە بریتین لە؛ قەرز و پێشینه‌کانی فه‌رمانبه‌ران، خانووبەرە، كشتوكاڵ، پیشه‌سازی و نیشته‌جێكردن. 

 

لێدوانی فه‌رمی: مەولوود سابیر، بەڕێوەبەری بانکە بازرگانییەکان بە ئاڤا میدیای ڕاگەیاند: دەمانەوێت بانکەکان بە سیستم بکەین، ئەوەش بە دامەزراندنی بانکی نیشتمان کە لقێک دەبێت لە بانکی ناوەندیی عێراق، واتە ڕێگەپێدراوی بانکی ناوەندی دەبێت.

 

زانیاری زیاتر: بانکی نیشتمان له‌م مانگەدا‌ دوای دانانی سەرۆک و ئەندامانی ئەنجوومەنی کارگێڕی، دەستبەکار دەبێت و 94 بانكی حكومی له‌خۆدەگرێت. حکومەتی هەرێمی کوردستان لە هەوڵدایە لە ڕێگەی دامەزراندنی ئەم بانکە متمانە بۆ دامەزراوە بانکییەکان و هاووڵاتیان و وەبەرهێنەران بگەڕێنێتەوە. ژمارەی بانکە بازرگانییەکانی لە کوردستان 94 بانکە و  87 بانکیان سەر بە کەرتی تایبەتن.

 

ئەمەش بزانە: سەرمایەی بانکەکە 250 ملیار دینارە، لەو بڕە 25 ملیار دیناری بە نەخت لە هه‌ژمارێکی تایبەتی بانکەکە دادەنرێت، 225 ملیاریش هی بانکە بازرگانییە تایبەتەکانە . 

 

بەپێی زانیارییەکانی ئاڤا نیوز، دیاریکردنی کات و بڕی قەرز و پێشینەکان دەکەوێتە دوای کردنەوەی بانکەکە، پەیوەست دەبێت بە توانای دارایی بانکەکە و داواکاری هاونیشتمانیان و فەرمانبەران.

 

باكگراوند: ئەو لقەی بانکی ناوەندیی عێراق کە ئێستا لە هەرێمی کوردستان هەیە، تەنیا كار بۆ حکومەتی عێراق دەکات و هیچ پەیوەندییەکی بە هەرێمی کوردستانەوە نییە، بەڵام بانکی نیشتمان هەموو بانکەکانی هەرێمی كوردستان لەخۆدەگرێت کە ژمارەیان 94 بانکە.