سەرۆکوەزیران بارزانی: تۆڕی ڕێگەی بەرفراوان و ئۆتۆبان لە سەرانسەری کوردستان دروست دەکەین

ئاڤا نیوز 

 

سەرۆکوەزیران بارزانی ڕایگەیاند، ئەرکی حکومەتە بە باشترین شێوە شەقام و ڕێگەوبانەکان دروست بکات و بیخاتە خزمەتی هاووڵاتیان.

 
وێنە گەورەکە: سەرۆکوەزیران بارزانی لە دهۆکە و بەردی بناغەی سێ پڕۆژە دادەنێت کە دوو پارکی گەورە و جووتسایدکردنی ڕێگەی باعەدرێ – ئێتیت-ـە.

 

لێدوانی فەرمی: سەرۆکوەزیران بارزانی لە میانی ڕێوڕەسمی دانانی بەردی بناغەی جووتسایدکردنی ڕێگەی باعەدرێ - ئێتیت ڕایگەیاند: ئەم پڕۆژەیەی ئێستا بەردی بناغەکەی دادەنێین، یەکێکە لەو پرۆژانەی کە زۆر پێویستە و بەشێکی گرنگە لە پرۆژەی پێکەوە گرێدانی پارێزگاکانمان بە ڕێگە ستاندارد و باشەکان.

 

خاڵی ئەرێنی: سەرۆکوەزیران بارزانی ئاماژەی بەوەکرد، ساڵی ڕابردوو سەرباری هەموو ئاستەنگە دارایی و ئابوورییەکان کارەکانمان لە بواری ڕێگە و پردەکان ڕانەگرتووە، بێگومان بە باشتربوونی ڕەوشی دارایی هەموو هەوڵێکی خۆمان دەدەین بۆ ئەوەی بە شێوەیەکی بەرفراونتر و خێراتر ئەو پرۆژانە ئەنجام بدەین.

 

بۆچی گرنگە: بە دانانی بەردی بناغەی پڕۆژەی جووتسایدکردنی ڕێگەی باعەدرێ - ئێتیت هیچ بەشێکی ڕێگەکە لە هەولێرەوە تاوەکو دهۆک بە یەکساید نامێنێت.

 

زانیاریی زیاتر: درێژی ڕێگەکە 26 کیلۆمەترە و بە گوژمەی 135 ملیار و 584 ملیۆن دینار، لەلایەن کۆمپانیای North Light جێبەجێ دەکرێت، بڕیارە لە ماوەی سێ ساڵدا تەواو بکرێت.