پارتی و یەکێتی: کۆک بووین پارێزگارێکی کورد لە کەرکووک دیاری بکرێت

ئاڤا دیجیتاڵ

کۆبوونەوەی پارتی دیموکراتی کوردستان و یەکێتیی نیشتمانی کوردستان لە دەباشان کۆتایی هات، لە ڕاگەیێنراوی هاوبەشی کۆبوونەوەکە هاتووە، "کۆک بووین پارێزگارێکی کورد لە کەرکووک دیاری بکرێت".

 

وێنە گەورەکە: ڕۆژی 18ـی کانوونی یەکەمی 2023 هەڵبژاردنى ئەنجوومەنى پارێزگاکانى عێراق کرا و ڕۆژی 21ـی کانوونى دووەم کۆمیسیۆنى باڵاى سەربەخۆى ئەنجامی کۆتایی پەسند کرد؛ بەپێی ئەنجامی هەڵبژاردن، کورد زۆرینەی دەنگەکانی بەدەستهێناوە، بۆیە بە ڕێککەوتنی نێوان پارتی و یەکێتی، ئەگەری یەکلاکردنەوەی پۆستی پارێزگار بۆ کورد بەهێزتر دەبێت. 

 

بۆچی گرنگە: زیاتر لە 6 ساڵە کورد پۆستی پارێزگاری کەرکووکی لەدەستداوە، یەکڕیزیی نێوان لایەنە کوردییەکان یارمەتیدەردەبێت بۆ بەدەستهێنانی ئەو پۆستە. 

 

سەرچاوەی فەرمی: دوای کۆبوونەوەکە ڕاگەیێنراوێکی هاوبەشیان بڵاوکردەوە و هاوڕابوون لەسەر ئەم خاڵانەی خوارەوە:-

 

• - هەردوولا کۆک بووین لەم قۆناغەدا لەپێناو بەرژەوەندی هاووڵاتیانی پارێزگای کەرکووک، بە هەموو پێکهاتەکانیەوە پارێزگارێکی کورد دیاری بکرێت، بۆ خزمەتی خەڵکی شار و شارۆچکەکان.
• 
  - هەردوولا هاوڕابووین ئەرکی سەرشانی یەکێتی و پارتی و سەرجەم لایەنە کوردستانییەکانە قەوارەی هەرێمی کوردستان بپارێزن و پارێزگاری لە دەستکەوتەکانی شۆڕش و خەبات و خوێنی شەهیدانى کوردستان بکەین .
•  
• - بۆ چارەسەری کێشە سیاسی و ئابوورییەکانی هەرێمی کوردستان لەگەڵ حکومەتی فیدراڵی لە ئاستێکی باڵا هەردوولا پێکەوە هەوڵی چارەسەرکردنی کێشەکان بەگشتی و بژێوی، ژیان، خزمەتگوزاری، بودجە و مووچە بە تایبەتی بدەین.

 

باکگراوند: دوایین کۆبوونەوەی نێوان پارتی دیموکراتی کوردستان و یەکێتیی نیشتمانی کوردستان لە 07ـی تشرینی دووەمی ساڵی ڕابردوو لەسەر ئاستی مەکتەبی سیاسیی لە پیرمام بەڕێوەچوو، دوای هەڵبژاردنی ئەنجوومەنی پارێزگاکانی عێراق کۆبوونەوەکەی ئەمڕۆ، یەکەم کۆبوونەوەی نێوانیان بوو.