سەرۆکی مەهەپە لەسەرکارلادانی سەرۆک شارەوانیی جۆلەمیرگ بە پێویست دەزانێت

ئاڤا نیوز

 

سەرۆکی پارتی مەهەپە، سەرۆک شارەوانیی جۆلەمێرگ بە "تیرۆرست" ناودەبات و لەسەرکارلادانی بە پێویست دەزانێت.

 

بۆچی گرنگە: لەسەرکارلابردنی سەرۆک شارەوانیی دەم پارتی لە جۆلەمێرگ، ئاماژەیە بۆ لابردنی سەرۆک شارەوانییەکانی دیکەی سەر بە دەم پارتی لە باکووری کوردستان.

 

وێنە گەورەکە: دەوڵەت باخچەلی، لەسەرکارلادانی سەرۆک شارەوانی دەم پارتی لە جۆلەمێرگ بە کارێکی پێویست ناوبرد و دەستخۆشی لە وەزیری ناوخۆی تورکیا کرد بۆ ئەو بڕیارە، ئەو لایەنانەی پاڵپشتیی دەم پارتیان کرد بە "دووڕوو" ناوی بردن.

 

لێدوانی فەرمی: دەوڵەت باخچەلی، سەرۆکی مەهەپە ڕایگەیاند، "تیرۆریستێکییان" لە 31 ئادار وەک سەرۆک شارەوانی بەربژێر کردووە، دەستبەسەرکردنیشی بە "نادیموکراسی و نادادی ناودەبەن، ئێمە سەرۆک شارەوانیی تیرۆریستمان ناوێت".

 

چی ڕوویدا؟  بەرەبەیانی دوێنی، محەممەد سدیق ئەکش، سەرۆک شارەوانیی دەم پارتی بە بڕیاری عەلی یەرلیکایە, وەزیری ناوخۆی تورکیا قۆڵبەستکراو و لە هەمان ڕۆژ عەلی چێلیک, پارێزگاری جۆلەمێریگ کە قەییوومە لە شوێنی ئەو دانرا.