بڕیاری دەستگیرکردنی مامۆستایەکی زانکۆی هەڵەبجە هەرا دەنێتەوە

ئاڤا نیوز

 

دادگەی کەتنی دووی سلێمانی سزای سێ مانگ بەندکردنی بەسەر د. شوان ئادەم، ڕۆژنامەنووس و مامۆستای میوان لە بەشی ڕاگەیاندنی زانکۆی هەڵەبجە سەپاند.

 

چیرۆکی سەرەکی: د. شوان ئادەم کە مامۆستای میوان بووە لە بەشی ڕاگەیاندنی زانکۆی هەڵەبجەیە، بۆ ساڵی خوێندنی 2020-2021 لە تاقیکردنەوەی ئیتیکی میدیایی، ژمارەیەک مانشێتی میدیا کوردییەکانی داناوە، تاوەکو قوتابییەکان ڕاست و هەڵە یان پێشێلکاریی پێوەرە پیشەییەکانی ڕاگەیاندن دیاری بکەن، بەڵام فەرمانبەرێک لە دەرەوەی زانکۆ سکاڵای لەسەر تۆمار کردووە.

 

لێدوانە فەرمییەکان: سەرهەنگ عزەت، بەرپرسی لقی هەڵەبجەی سەندیکای ڕۆژنامەنووسانی کوردستان بە ئاڤا نیوزی گوت: بەنیازین کۆبوونەوەیەک لەبارەی بڕیاری دەستگیرکردنی د. شوان ئادەم بکەین، چونکە ئەو بڕیارەی دراوە دژی بەرتەسکردنەوەی ئازادی ڕادەربڕین و ڕۆژنامەوانییە، ئێمە هەڵوێستی خۆمان دەبێت.

 

ئەحمەد گەرمیانی، سەرۆکی یەکێتیی مامۆستایانی کوردستان بە ئاڤا نیوزی ڕاگەیاند: پشتگیری د. شوان دەکەین و هەرچی پێویست بێت بۆی دەکەین، لقی خۆمان لە هەڵەبجە ئاگادار دەکەینەوە تا بەدواداچوون بکات و سەردانی دادگە بکەن.

 

لەلایەکی دیکەوە: سەرچاوەیەکی بەرپرس لە سەرۆکایەتیی زانکۆی هەڵەبجە بە ئاڤا نیوزی گوت: ئەمڕۆ سەرۆکی زانکۆی هەڵەبجە لەگەڵ ژووری یاسایی لەسەر ئەو بابەتە کۆدەبنەوە، تا دەرچەیەکی یاسایی بۆ دەربازکردنی د. شوان ئادەم بدۆزنەوە، چونکە ئەو تاقیکردنەوە و پرسیارانەی دانراوە، بە فلتەری سەرۆکایەتیی بەشی ڕاگەیاندن ڕۆشتووە، کەس لە دەرەوەی زانکۆ مافی ڕەخنەگرتنی نییە.