هەرێمی کوردستان بانگهێشتی کۆڕبەندی ئابووریی جیهانی لە ڕووسیا دەکرێت

ئاڤا نیوز

 

کۆڕبەندی ئابووریی ڕووسیا بۆ ماوەی دوو ڕۆژ بەردەوام دەبێ و 145 وڵاتی جیهان بە هەرێمی کوردستانیشەوە تێدا بەشدار دەبن.

 

وێنە گەورەکە: ڕووسیا ساڵانە کۆڕبەندی ئابووریی جیهانی ئەنجام دەدات و زۆرێک لە وڵاتانی جیهان بانگهێشت دەکرێن.

 

بۆچی گرنگە: لەم کۆڕبەندە ئابوورییەدا، دەتوانرێ سەرنجی وەبەرهێنەرانی جیهان بۆ وەبەرهێنان ڕابکێشێ و دەرفەتی سەرمایەگوزارییان لە هەرێمی کوردستان بۆ بڕەخسێنرێت.

 

لێدوانی فەرمی: بەرگەشت ئاکرێی، گوتەبێژی دەستەی وەبەرهێنانی هەرێمی کوردستان، بە ئاڤا نیوزی گوت: بەفەرمی لەلایەن وڵاتی ڕووسیاوە بانگهێشت کراوین، شاندەکە لە د. محەمەد شوکری، سەرۆکی دەستەی وەبەرهێنان و کەمال محەممەد، وەزیری کارەبا و سامانە سرووشتییەکان بەوەکالەت پێکهاتووە، ئامانجمانە ئەو دەرفەتی وەبەرهێنانەی هەمانە وڵاتانی بەشداری پێ بناسێنین و چەند کۆبوونەوەیەکیش لەگەڵ لایەنی حکومی و ژوورە بازرگانییەکانییەکانیان دەکەین.

 

زانیاریی بەدەستهاتوو: ڕووسیا لە کەرتی نەوت و وزە وەبەرهێنانی لە هەرێمی کوردستان کردووە و دەتوانێت لە بوارەکانی دیکەش سەرمایەگوزاری بکات و ڕۆڵی لە بووژاندنەوەی ژێرخانی ئابووری و پیشەسازیدا هەبێت.

 

ئەوەی پێویستە بیزانیت: لە سانپترسپۆرگی ڕووسیا کۆڕبەندی ئابووری بەڕێوەدەچێت و لە ڕۆژی 5-6-2024 دەست پێ دەکات، تا ڕۆژی 8-6-2024 بەردەوام دەبێت، تێیدا ڤلادیمێر پۆتین، سەرۆکی ڕووسیا گوتاری دەبێت.