دیاربەکر لە لیستی زیانلێکەوتووانی بوومەلەرزە دەرنەکراوە

ئاڤا نیوز

دوای بڵاوبوونەوەی هەواڵی "دەرکردنی دیاربەکر لە لیستی ئەو شارانەی تورکیا کە زیانلێکەوتووی بوومەلەرزەن"، ئاڤا نیوز بەدواداچوونی بۆ ئەو هەواڵە کرد و ڕاستی هەواڵەکە پشتڕاست دەکاتەوە.

 

بۆچی گرنگە: دەرکردنی شاری دیاربەکر لەو لیستە، لەکاتێکدایە بەهۆی لادانی سەرۆک شارەوانیی جۆلەمێرگ، دۆخی شارەکانی باکووری کوردستان شڵەژاوە و بەمەش ئەوەندەی دیکە، ناڕەزایەتیەکان گەورە دەکات.

 

لێدوانی تایبەت: سەرهات ئێرەن، ئەو پەرلەمانتارەی لەو بارەیەوە قسەکەی کردووە بۆ ئاڤا ڕوونی کردەوە و گوتی: "مەبەستم ئەوە نەبووە کە دیاربەکر بەتەواوی لە لیستەکە دەرکراوە، ئەو کەسانەی لە دیاربەکر دەژین لە کاتی ڕاکێشانی کرێدی بۆ نۆژەنکردنەوەی ماڵەکانیان، لێخۆشبوونی ڕێژەی 40%ـی زیادەی سوو نایانگرێتەوە، لەکاتێکدا ئەم لێخۆشبوونە بۆ دانیشتووانی شارەکانی دیکەی لیستی بوومەلەرزە هەیە".

 

لەلایەکی دیکەوە: مێهمێت کەماچ، پەرلەمانتاری دەم پارتی لە دیاربەکر بێ ئاگایی خۆی لە بڕیارەکە ڕاگەیاند و گوتی: پێم وانییە لەم کاتە هەستیاردا، حکومەت بڕیاریکی لەو شێوەیە دەربکات. 

 

زانیاریی بەدەستهاتوو: ئەو پەرلەمانتارە ڕاشکاوانە ئەوەی بۆ ئاڤا ڕوون کردەوە، بڕیارەکە وەک "تۆڵەسەندنەوەی دەسەڵاتدارنی تورکیا لە خەڵکی ئەو شارەیە، بەرامبەر دەنگدانیان بە دەم پارتی".

 

ئەمەش بزانە: بڕیاری لێخۆشبوونەکە تەنیا پێنج پارێزگا دەگرێتەوە لە کۆی ئەو 11 پارێزگایەی بەر بوومەلەرزەکە کەوتوون.

 

باکگراند: شەشی شوباتی ساڵی ڕابردوو، بوومەلەرزەیەک بە گوڕی 7.7 پلەی ڕێختەر، 11 پارێزگای تورکیا و باکووری کوردستانی هەژاند.