ڕێکخراوی چمک داوای هەڵگرتنی سزای بەندکردنی سەر مامۆستا شوان دەکات

ئاڤا نیوز

 

دادگەی کەتنی دووی سلێمانی بڕیاری سێ مانگ زیندانیکردنی بەسەر د. شوان ئادەم، ڕۆژنامەنووس و مامۆستای زانکۆ سەپاند و ڕێکخراوی چمک داوای هەڵگرتنی سزای بەندکردنەکەی دەکات.

 

چیرۆکی سەرەکی: د. شوان ئادەم کە مامۆستای میوان بووە لە بەشی ڕاگەیاندنی زانکۆی هەڵەبجە، بۆ ساڵی خوێندنی 2020-2021 لە تاقیکردنەوەی ئیتیکی میدیایی، ژمارەیەک مانشێتی میدیا کوردییەکانی داناوە، تاوەکو قوتابییەکان ڕاست و هەڵە یان پێشێلکاریی پێوەرە پیشەییەکانی ڕاگەیاندن دیاری بکەن، بەڵام فەرمانبەرێک لە دەرەوەی زانکۆ سکاڵای لەسەر تۆمار کردووە. 

 

ڕاگەیێنراوی فەرمی: ڕێکخراوی چاودێری میدیایی کوردی بڵاوی کردەوە: لە ڕۆژی 3-6-2024 بە بڕیاری ژمارە 2534/ک/2021، دادگەی کەتنی دووی سلێمانی بە تاوانی دانانی پرسیارەکانی تاقیکردنەوەی ئیتیکی میدیا، سزای سێ مانگ بەندکردنی بەسەر سەرۆکەکەیان سەپاند، داوا دەکەین لەلایەن دادگەی تێهەڵچوونەوە ئەم بڕیارە هەڵبوەشێنرێتەوە.

 

زانیاریی زیاتر: بە لەبەرچاوگرتنی تەمەن و باری ژیان و نەبوونی پێشینەی تاوانکاری، بەپێی ماددە 433/آ لە یاسایی سزادانی عێراق، ژمارە 111ـی ساڵی 1969 سزای "حەپسی سووک"، بەسەر ئەو د. شوان ئادەم سەپێنرا، دادگە جێبەجێکردنی سزاکەی بۆ ماوەی سێ ساڵ وەستاندووە، بە مەرجێک بەڵێن بدات لەو ماوەیەدا ڕەفتار و هەڵسوكەوتی چاک بکات.

 

لەلایەکی دیکەوە: ڕێکخراوی چمک بڕیارەکەی دادگەی کەتنی دووی سلێمانی بە پێشهاتێکی مەترسیدار لە پێش ئازادی ڕادەربڕین، ڕۆژنامەگەری، وانەگوتنەوە و توێژینەوەی ئەکادیمی و کاری ئەکادیمی لە کوردستان دەزانێت.