ئێران بۆ بەهێزكردنی پەیوەندییەكانی لەگەڵ هەرێمی كوردستان شاندێک دەنێرێتە هەولێر

ئاڤا نیوز

 

شاندێكی كۆماری ئیسلامیی ئێران لە هەرێمی كوردستانن، ڕۆژی پێنجشەممە لەگەڵ وەزیری ناوخۆ كۆدەبنەوە و باس لە بەهێزكردنی پەیوەندییەكانیان دەکەن.

 

ئەوەی پێویستە بیزانیت: شاندەكە پێكدێت لە نوێنەری وەزارەتی دەرەوەی ئێران و پارێزگاری سنە، كرمانشان، ئورمییە و كۆنسوڵەکانی ئێران لە سلێمانی و هەولێر ڕۆژی چوارشەممە 05-06-2024 لەگەڵ پارێزگاری هەولێر كۆبوونەوە و پێنجشەممەش لەگەڵ وەزیری ناوخۆی حكومەتی هەرێمی كوردستاندا كۆدەبنەوە.

 

لێدوانی فەرمی: ئومێد خۆشناو، پارێزگاری هەولێر ڕایگەیاند: سەردانی شاندەكە بۆ هەرێمی كوردستان گرنگییەكی گەورەی هەیە و باس لە چەندین پرسی گرنگ بەتایبەتی زیارەتكارانی ئێران بۆ هەرێمی كوردستان و پتەوكردنی پەیوەندییەكانی هەردوولا كرا.

 

بۆچوونی لایەنی بەرامبەر: محەممەد سادقی موعتەمیدیان، پارێزگاری ئورمییە ڕایگەیاند: پەیوەندیی نێوان کۆماری ئیسلامی ئێران و هەرێمی کوردستان تەنیا سیاسی نییە، بەڵکو پەیوەندییەکی بازرگانی، فەرهەنگی و هەمەچەشتە و ئامانجی  سەردانەکە پتەوکردنی پەیوەندییەکانە.

 

بۆچی گرنگە: هەرێمی کوردستان و کۆماری ئیسلامیی ئێران، نزیکەی 650 کیلۆمەتر سنووری هاوبەشیان هەیە. حەوت دەروازەی سنووریی لەنێوانیان هەیە و قەبارەی بازرگانییەکەی نێوانیان زیاتر لە حەوت ملیار دۆلارە.