نوێترین زانیاری لەبارەی دوو لیوا هاوبەشەکەی پێشمەرگە و سوپای عێراق

ئاڤا نیوز 

 

نوێنەری حکومەتی هەرێمی کوردستان لە فەرماندەی هێزە هاوبەشەکانی عێراق لەبارەی دوو لیوا هاوبەشەکە ڕایگەیاند، هەموو کارەکان تەواو بووە، مووچەکانیان و کارە کارگێڕییەکان لەگەڵ وەزارەتی بەرگریی عێراق کۆتایی پێهاتووە و شوێنەکانیشیان دیاریکراوە، تەنیا ئەوە ماوە دەستبەکار ببن.

 

بۆچی گرنگە: بە دەستبەکاربوونی ئەو لیوا هاوبەشانە لە ناوچە کوردستانییەکانی دەرەوەی هەرێمی کوردستان، ئەو هەڕەشانەی لەسەر کوردانی نیشتەجێبووی ئەو ناوچانە هەیە، نامێنێت و هەست بە ئاسایش و ئارامی دەکەن.

 

لێدوانی فەرمی: لیوا عەبدولخالق تەڵعەت، بە ئاڤا نیوزی ڕاگەیاند: ئێستا هەم ئەفسەرەکان و هەم سەربازەکانی ئەو دوو لیوایە مووچەکانیان وەردەگرن، بۆ ماوەی سێ مانگیش مەشق و ڕاهێنانیان پێکراوە، بارەگای لیواکە بەشێوەیەکی کاتی لە شارۆچکەی مەخموور دانراوە.

 

ڕێککەوتنەکە بەم شێوەیەیە: لەبارەی دابەشکردنی فەوجەکانی سەر بەو دوو لیوایە عەبدولخالق تەڵعەت ڕایگەیاند: دوو لیواکە لە چوار فەوج پێکدێت، فەوجێکیان لە ناوچەی شوان، فەوجێک لە پەلکانە، فەوجێکی دیکە لای قەرەچووغ و فەوجی چوارەمیش لە ناوچەی کوشاف دەبن.

 

زانیاریی زیاتر: 542 کیلۆمەترهێڵی بەرگریی لەنێوان هێزی پێشمەگە و سوپای عێراق هەیە، ئەو هێزانە لەو شوێنانە جێگیر دەکرێن کە ناوچەی گرنگی ئەمنی هاوبەشن لەنێوان سوپای عێراق و هێزەکانی پێشمەرگە، تەنیا ماوە لەو شوێنانە دەستبەکار ببن، لە ڕووی پڕچەککردنەوە دەتوانم بڵێم هەموو پێداویستییەکانیان بۆ دابینکراوە، مووچەکەشیان لەسەر سوپای عێراقە.