شێخ نیاز نەقشبەندی: سەرجەم حاجییانی کوردستان بەسەلامەتی گەیشتنە سعودیە

ئاڤا نیوز 

 

سەرپەرشتیاری گشتیی پڕۆسەی حەج ڕایگەیاند، سەرجەم حاجییانی کوردستان لە ڕێگەی ئاسمانی و وشکانییەوە بە سەلامەتی گەیشتنە شاری مەککە.

 

وێنە گەورەکە: ئەمساڵ چوارهەزار و 685 حاجیی هەرێمی کوردستان بە مەبەستی بەجێهێنانی فەریزەی حەج، گەشتی وڵاتی سعودیەیان کرد.

 

لێدوانی فەرمی: شێخ نیاز ڕاغب نەقشبەندی، سەرپەرشتیاری گشتیی پڕۆسەی حەج بە ئاڤا نیوزی ڕاگەیاند: سوپاس بۆ خوای گەورە سەرجەم حاجییانی کوردستان ئەمڕۆ گەیشتنە شاری مەککەی پیرۆز، تاوەکو ئێستاش هیچ کێشە و گرفتێکی ئەوتۆ نەهاتووەتە پێشەوە کە مایەی نیگەرانی بێت بۆ حاجییانمان.

 

زانیاریی زیاتر: ئەوەی لە دەستی حکومەتی هەرێمی کوردستان هاتووە هەموو پێداویستییەک بۆ حاجییان دابین کراوە، خزمەتگوزارییەکانی وەک: شوێنی مانەوەیان، گواستنەوە، تەندروستی، ڕێنمایی ئایین و خۆراک. لە ڕووی تەندروستییەوە سەرجەم حاجییانی کوردستان سەلامەتن، زیاتر لە 20 لیژنەی جۆراوجۆر پێک هێنراون بۆ خزمەتکردنی حاجییان.

 

ئەمەش بزانە: ئەمساڵ تێچووی حەج بە دیناری عێراقی وەرگیراوە و دۆلاریش بە نرخی بانکی ناوەندی وەرگیراوە بە 132هەزار دینار؛ تێچووی ڕێگەی وشکانی پێنج ملیۆن و 300هەزار دینار و ڕێگەی ئاسمانیش شەش ملیۆن و 350هەزار دینارە.

 

باکگراوند: 27ـی ئایار یەکەمین کاروان بە فڕۆکە بەرەو سعودیە بەڕێ کەوتن. سەرلەبەیانی ڕۆژی 29-05-2024 کاروانی حاجییان بە ڕێگەی وشکانی دەستی پێ کرد و ئەمڕۆش دوا کاروانی حاجیان گەیشتە سعودیە.