ڕێبەر ئەحمەد: ئێمە هەرگیز نابینە بەشێک لە گەڕاندنەوەی زۆرەملێی ئاوارەکان

ئاڤا نیوز

 

وەزیری ناوخۆی هەرێمی کوردستان لە میانی کردنەوەی سەنتەری ڕاوێژکاری کۆچ لە هەولێر گوتی، نیگەرانین لە بڕیارەکەی عێراق بۆ گەڕاندنەوەی زۆرەملێی ئاوارەکان، چونکە کەشی گونجاویان بۆ ئەو پرۆسەیە نەڕەخساندووە.

بۆچی گرنگە: سەنتەرەکە بە پاڵپشتی دارایی وڵاتانی نەرویج و سوید کرایەوە و بۆ ڕێگریکردن لە کۆچی نایاساییە و هاوکاریکردنی ئەو هاووڵاتیانەیە کە لە تاراوگە دەگەڕێنەوە. هەرێمی کوردستان لەپاڵ هەشت وڵاتی جیهان دەبێتە خاوەن سەنتەرەکە.

لێدوانی فەرمی: ڕێبەر ئەحمەد، وەزیری ناوخۆی هەرێمی کوردستان لە میانەی کردنەوە سەنتەرەکەدا ڕایگەیاند، هەرێمی کوردستان ڕۆڵی سەرەکی بینیوە لە ناوچەکە بۆ کەمکردنەوەی کۆچ بەرەو ناوچەکانی دیکە، تاوەکو ئیستا ملیۆنێک ئاوارە و پەنابەر تێیدا هەن. داخستنی کامپەکان بەبێ زەمینەسازی جێگای نیگەرانییە و سیاسەتی هەرێمی کوردستان بۆ کۆچبەران گەڕانەوەی ئارەزوومەندانەیە.

گۆشەیەکی دیکە: 300 هەزار ئاوارەی شنگال لە هەرێمی کوردستانن، تاوەکو ئێستا هێزە چەکدارە نایاسییەکان لە ناوچەکانیانن، هیچ هەنگاوێک بۆ ئاسایکردنەوەی بارودۆخ و فەراهمەکردنی خزمەتگوزاری سەرەتایی و گەڕاندنەوەی ئاسایش نەگیراوەتەبەر، لەسەر ئەمەش وەزیری ناوخۆ دەپرسێت، "بەو دۆخە چۆن ئاوارەکان دەگەڕێنەوە ناوچەکانیان"؟.