پەرلەمانتارێکی دەم پارتی بۆ ئاڤا نیوز: هەوڵ دەدەین پشتیوانی پارتە ئۆپۆزیسیۆنەکان بەدەست بهێنن

ئاڤا نیوز

 

عومەر فاروق، پەرلەمانتاری دەم پارتی ڕایدەگەیێنێت، ناڕەزایەتییەکان لەژێر ئابڵووقەی هێزە ئەمنییەکان بەردەوامە و بەشێک لە لایەنە ئۆپۆزیسیۆنەکان لەگەڵ ئێمەن.

 

وێنە گەورەکە: دوای دانانی قەییووم لە شوێنی سەرۆک شارەوانیی دەم پارتی لە جۆلەمێرگ، دۆخی شارەکانی باکووری کوردستان، تەواو شڵەژاوە و دەم پارتی هەڕەشەی "تۆڵەسەندنەوە لە قەییووم دەکات".

 

لێدوانی تایبەت: عومەر فاروق، پەرلەمانتاری دەم پارتی بە ئاڤا نیوزی گوت: ئەم بڕیارە سیاسییە و تەواو دژی ئیرادەی خەڵکە، ئەوان ڕێز لە هەڵبژاردەکانی خەڵک ناگرن.

 

زانیاریی بەدەستهاتوو: ئەو پەرلەمانتارە لە هەوڵدایە پشتیوانی پارتە ئۆپۆزیسیۆنەکان بەدەست بهێنێت و جەهەپە، پارتی سەعادەت و ئیی پارتی "بریارەکە بە نادادپەروەری ناو دەبەن".

 

ئەوەی پێشبینی دەکرێت: عومەر فاروق پێیوایە، دوای لێدوانەکەی ئەردۆغان کە گوتی "ئەمە هەنگاوی یەکەمە"، دوای لابردنی سەرۆک شارەوانیی جۆلەمێرگ، نۆرەی شارەوانییەکانی دیکەی باکووری کوردستان دێت.