هەولێر و تاران جەخت لەسەر پتەوترکردنی پەیوەندییەکانیان دەکەنەوە

ئاڤا نیوز

 

شاندێکی ئێران لەگەڵ ڕێبەر ئەحمەد، وەزیری ناوخۆ و پارێزگارەکانی هەرێمی کوردستان کۆبووەوە و هەردوولا جەختیان لەسەر پتەوترکردنی پەیوەندییەکانیان کردەوە.

 

وێنە گەورەکە: شاندێکی وڵاتی ئێران لە هەرێمی کوردستانە کە پێکهاتووە لە پارێزگاری ئورمییە، کوردستان، کرماشان و نوێنەری وەزارەتی دەرەوەی ئێران، چەند پەرلەمانتارێک و  هەردوو سەرکۆنسوڵی ئێران لە هەولێر و سلێمانی.

 

بۆچی گرنگە: هەرێمی کوردستان و ئێران، حەوت دەروازەی سنووریی لەنێوانیان هەیە و قەبارەی بازرگانییەکەی نێوانیان زیاتر لە حەوت ملیار دۆلارە، پتەوکردنی ئەو پەیوەندییە کاریگەری لەسەر زیادبوونی دەبێت.

 

زانیارییە بەدەسهاتووەکان: ئاڤا نیوز زانیویەتی کردنەوەی مەرزی نوێی کێلەشن، فراوانکردنی پەیوەندییە بازرگانییەکان و ئامادەکاری بۆ ڕێکارەکانی پێشوازی لە زیارەتکاران بۆ شوێنە ئایینییەکان و چلەی ئیمام حوسێن، تەوەری سەرەکیی کۆبوونەوەکە بوون.

 

لەلایەکی دیکەوە: شاندی ئێران گوتوویەتی، دەیانەوێت هەماهەنگیی زیاتریان لەگەڵ هەرێمی کوردستان هەبێت بە تایبەت لەسەر خاڵە سنووریەکان و هاوکاری خۆیان لەو بارەیەوە بەتەواوی پیشانداوە.

 

ئەوەی پێویستە بیزانیت: بڕیاریشە شاندەکەی ئێران لەگەڵ سەرۆکی هەرێمی کوردستان و سەرۆکوەزیران بارزانی کۆببنەوە.