سەرۆکوەزیران بارزانی لەگەڵ شاندێکی ئێران کۆدەبێتەوە

ئاڤا نیوز

 

شاندێكی باڵای ئێران سەردانی سەرۆكوەزیران بارزانی كرد و هەردوولا هاوڕابوون لەسەر پتەوكردنی پەیوەندییە ئابووری، بازرگانی و سیاسییەكانی نێوانیان.

 

بۆچی گرنگە: هەرێمی کوردستان و کۆماری ئیسلامیی ئێران، نزیکەی 650 کیلۆمەتر سنووری هاوبەشیان هەیە. حەوت دەروازەی سنووریی لە نێوانیان هەیە و قەبارەی بازرگانییەکەی نێوانیان زیاتر لە حەوت ملیار دۆلارە.

 

وێنە گەورەكە: دوو ڕۆژە شاندێكی كۆماری ئیسلامیی ئێران كە پێكهاتووە لە نوێنەری وەزارەتی دەرەوە و پارێزگاری سنە، كرماشان، ئورمییە، كۆنسوڵەكانی ئێران لە سلێمانی و هەولێر، ئەمرۆ لەگەڵ سەرۆكوەزیران بارزانی كۆبوونەوە و جەختیان لە پتەوكردنی پەیوندییەكانی هەردوولا كردەوە.

 

بڵاوکراوەی فەرمی: سەرۆكوەزیران بارزانی ڕایگەیاند: "گفتوگۆمان لەبارەی پەرەپێدانی پەیوەندی دوولایەنە و هاوئاهەنگی لە بوارەکانی ئاڵوگۆڕی بازرگانی و ئاسانکاری بۆ هاتووچۆی گەشتیاران لەنێوان هەردوولادا کرد، بەتایبەتی ئامادەکارییەکانی پێشوازیکردن لە زیارەتکارانی ئێران بۆ شوێنە پیرۆزەکانی باشوور و ناوەڕاستی عێراق".