تورکیا بە دروشمی "کارەساتی سەدە" یادی بوومەلەرزەکەی ساڵی ڕابردوو دەکاتەوە

ئاڤا دیجیتاڵ

 

ساڵێک بەسەر بوومەلەرزەکەی تورکیا تێپەڕ دەبێت و شارەزایانی بواری جیۆلۆجی تورکیا هۆشداری دەدەن، وڵاتەکە بۆ ڕووبەڕووبوونەوەی بوومەلەرزەیەکی دیکەی هاوشێوە، ئامادە نییە. 

 

چیرۆکی سەرەکی: بەرەبەیانێکی زوو، بوومەلەرزەیەک بە گوڕی 7.6-7.7 رێختەر باشووری رۆژئاوای تورکیای هەژاند. بوومەلەرزەکە هێندە بەهێز بوو لە ماوەی 65 چرکەدا، 53 هەزار و 537 کەسی خستە ژێر داروپەردووی باڵەخانەکان و زۆرینەشیان هەر لەوێ نێژران. 

بەدیاریکراوی ڕووداوەکە کاتژمێر 4:17 خوولەکی بەرەبەیان ڕوویدا. ناوەندیی بوومەلەرزەکە کەوتبووە شارەکانی مەراش و هاتای. هەر ڕاستەوخۆ دوای بوومەلەرزەکە، تیمەکانی گەڕان و فریاگوزاری لە هەموو جیهانەوە ڕەوانەی تورکیا کران. 

 

لێدوانی فەرمی: هەر دوای بوومەلەرزەکە، رەجەب تەیب ئەردۆغان، سەرۆککۆماری تورکیا گوتی: "ئێمە ناتوانین قەرەبووی ئەو کەسانە بکەینەوە کە لەدەستماندان، بەڵام پێویستە لەسەرمان قەرەبووی خانەوادەکانیان بکەینەوە". 

ئەردۆغان بەڵێنی دروستکردنی 650 هەزار یەکەی نیشتەجێبوونیشی وەک قەرەبوو بەو کەسانە دا کە بەهۆی بوومەلەرزەکەوە نەک هەر کەسوکاریان، ماڵەکانیشیان لەدەستدا. 

فەخرەدین ئاڵتوون، وەزیری تەندروستیی تورکیا لە ساڵیادی بوومەلەرزەکەی شەشی شوباتی ساڵی ڕابردوودا گوتی: "ئێمە پێکەوەین... دەوڵەت و میللەت دەست لەنێو دەستن، بەهێزین و بە ئومێدەوە چاومان لە داهاتووە."

 

ژمارەکان وادەڵێن: بوومەلەرزەکە 11 پارێزگای تورکیای گرتەوە و زیانی بە 14 ملیۆن هاووڵاتیش گەیاند. هەروەها 53 هەزار و 537 کەسیش گیانیان لەدەستدا. دوای 11 مانگ بەسەر کارەساتەکەدا، 46 هەزار یەکەی نیشتەجێبوون دروستکران و ئێستا ئامادەن ڕادەستی زیانلێکەوتووان بکرێن.

ڕۆژی شەممە 3-2-2024 تیرپشک بۆ حەوت هەزار یەکە کرا و بەسەر دانیشتووانی شاری هاتای دابەشکران. حکومەتی تورکیا بەڵێنی داوە مانگانە 15 بۆ 20 هەزار یەکەی نیشتەجێبوون بەسەر زیانلێکەوتووان دابەشبکات.

بوومەلەرزەکەی تورکیا، وڵاتانی ناوچەکەی هێنایە سەر خەت و هاوکاری مرۆیی و فریاگوزارییان پێشکەشی زیانلێکەوتووان کرد؛ لە 90 وڵاتەوە 11 هەزار و 488 تیمی فریاگوزاری، 294 هەزار و 743 خێوەت، 12 هەزار و 685 کابینەیان بۆ تورکیا نارد. 

 

هۆکارە زانراوەکان: بەهۆی خراپی کوالێتیی بیناسازییەوە تورکیا باجێکی زۆری داوە؛ کۆمپانیاکان بە پێشێلکردنی یاساکانی سەلامەتی، بەکارهێنانی کەرەستەی بیناسازی هەرزان و دروستکردنی نهۆمی زیادە بە شێوەیەکی نایاسایی تۆمەتبارن.

 

باکگراوند: لە ماوەی ساڵێکدا 57 هەزار و 15 بوومەلەرزە لە تورکیا ڕوویداوە، کاریگەرترینیان بوومەلەرزەکەی شەشی شوباتی ساڵی ڕابردوو بوو کە باشووری رۆژئاوای وڵاتەکەی هەژاند. بەهۆیەوەش سەدان باڵەخانە ڕووخان و زیاتر لە 53 هەزار کەسیش کەوتنە ژێر داروپەردووی باڵەخانەکان و گیانیان لەدەستدا.