مەلەکردن لە بەنداو و ڕووبارەکانی دهۆک قەدەغە کرا

ئاڤا نیوز

 

بەڕێوەبەری بەنداوی دهۆک ڕایگەیاند، بەهۆی زۆربوونی حاڵەتەکانی خنکان، مەلەکردن لە بەنداو و ئاوەکانی سنووری پارێزگاکە قەدەغە دەکرێت.

 

بۆچی گرنگە: ئەم بڕیارە بۆ پاراستنی سەلامەتیی گیانی هاونیشتمانییانە. مەلەکردن لەو شوێنانە، دەبێتە مەترسی بۆسەر ژیانیان.

 

لێدوانی فەرمی: فەرهاد محەمەد، بەڕێوەبەری بەنداوی دهۆک بە ئاڤا نیوزی ڕاگەیاند: "لە وەرزی هاوین، ئەوانەی خولیای مەلەکردنیان هەیە، لە بەنداوەکانی دهۆک و چەندین شوێنی دیکە ڕووبەڕووی مەترسیی خنکان دەبنەوە، بۆیە مەلەکردن لە بەنداو و ئاوەکانی سنووری پارێزگای دهۆک قەدەغە دەکرێت".

 

ئەوەی پێوستە بیزانیت: مەلەکردن لە ئاوی بەنداوی دهۆک، خنس لە قەزای شێخان و خابیر لە ئیدارەی سەربەخۆی زاخۆ قەدەغە دەکرێت، هەرکەسێکیش سەرپێچی بکات، ڕووبەڕووی یاسا دەبێتەوە.

 

باکگراوند: لە سەرەتای ئەمساڵەوە تا ئێستا، شەش کەس لە بەنداو و ڕووبارەکانی پارێزگای دهۆک خنکاون.