150 ساڵ لەمەوبەر یەکەم نووسینگەی پۆستە لە عێراق كرایەوە

ئاڤا نیوز 

بەریتانیا پێش سەدە و نیوێک، بۆ یەکەمجار نووسینگەی خزمەتگوزاریی پۆستە و گەیاندنی لە عێراق و لە سەردەمی عوسمانییەکان دامەزراند.

چیرۆکی سەرەکی: لە ساڵی 1868 بەریتانیا بۆ یەکەمجار دوو نووسینگەی پۆستەی لە عێراق دامەزراند و لە ساڵی 1921 دوای دامەزراندنی دەوڵەتی عێراق، نووسینگەی پۆستەی عێراق بە فەرمی دامەزرێنرا.

ئەوەی پێویستە بیزانیت: لە ساڵی 1930 یاسای پۆستەی عێراقی دەرچوو و دواتر نووسینگەکانی پۆستە و گەیاندن بەشێوەیەکی بەرفراوان لە شار و ناوچەکانی عێراق بڵاوبووەوە، لە ساڵی 1933 هێڵی پۆستەی هەولێر_ کۆیە و ڕواندز_ کۆیە دامەزرا.

گۆشەیەکی دیکە: ئەمڕۆ یەکشەممە، سەرۆکوەزیران بارزانی، سەنتەری ئیگڵ پۆستی لە هەولێر کردەوە تایبەت بە خزمەتگوزاریی پۆستەی نێوخۆیی ونێودەوڵەتی، بە ئامانجی پەرەپێدانی پۆستە و دامەزراندنی سیستەمی پۆستی دیجیتاڵ و گەشەسەندنی بواری پۆستە لە هەرێمی کوردستان.

بۆچی گرنگە: لە هەرێمی کوردستان و عێراق پۆستە گرنگییەکەی پێشووی نەماوە، بەڵام پرۆژەی ئیگڵ پۆست لە ڕێگەی وشکانی، دەریایی و ئاسمانی خزمەتگوزاریی گەیاندن لە سەرجەم کیشوەرەکان دابین دەکات.