شاندێکی باڵای ئێران سەردانی هەرێمی کوردستان دەکات

ئاڤا نیوز

 

سەرپەرشتیاری کاروباری وەزارەتی دەرەوەی ئێران لەگەڵ شاندێکی یاوەری سەردانی عێراق و هەرێمی كوردستان دەکەن، بڕیارە ڕۆژی هەینی بگەنە هەولێر و لەگەڵ بەرپرسانی باڵای هەرێمی کوردستانیش کۆببنەوە دواتریش سەردانی سلێمانی دەکات.

وێنە گەورەكە: سەردانی شاندە ئێرانییەکە بۆ تاوتوێکردنی ئەو پەیوەندییانەیە کە جێگەی بایەخی هەردوولایە، هەولێر و تاران دەخوازن پەیوەندیەکانیان تۆکمەتر بکەن.

 

زانیاریی بەدەستهاتوو: ڕۆژی هەینی 14-06-2024، عەلی باقر کنی، سەرپەرشتیاری کاروباری وەزارەتی دەرەوەی ئێران دوای بەغدا دەگاتە هەولێر و بڕیارە لەگەڵ هەریەک لە سەرۆک بارزانی، نێچیرڤان بارزانی، سەرۆکی هەرێمی کوردستان و سەرۆکوەزیران بارزانی کۆببێتەوە و دواتر سەردانی سلێمانیش دەکات.

 

قووڵتر: لە هەمان ئێوارەدا وەزیری دەرەوەی ئێران بەوەكالەت دەچێتە سلێمانی و لەگەڵ بەرپرسانی باڵای یەکێتی کۆدەبێتەوە، دواتر دەگەڕێتەوە بۆ وڵاتەكەی.

 

باكگراوند: ئەمە یەکەم سەردانی عەلی باقرە بۆ عێراق و هەرێمی کوردستان لەدوای دەستبەکاربوونی، کە دوای گیانلەدەستدانی سەرۆککۆماری ئەو وڵاتە و وەزیری دەرەوە لە ڕووداوی تێکشکانی فڕۆکەکەیاندا پۆستەکەی وەرگرتووە.