حەوتەم حاجی هەرێمی کوردستان کۆچی دوایی کرد

ئاڤا نیوز

 

بەڕێوەبەرایەتی حەج و عومرەی هەرێمی کوردستان، هەواڵی گیان لەدەستدانی حەوتەم حاجی هەرێمی کوردستانی ڕاگەیاندووە.

وێنە گەورەکە: ساڵانە بۆ بەجێهێنانی فەریزەی حەج، بەڕێگای یاسایی هاونیشتمانیان ناویان تۆمار دەکەن، بەڵام بەشێکی دیکە لەڕێگای وەرگرتنی ڤیزای یەکساڵە بۆ فەریزەی حەج دەچنە سعودیە و لە دەرەوەی ڕێنماییەکان مەراسیمی حەج جێبەجێ دەکەن.

لێدوانی فەرمی: کاروان ستوونی، گوتەبێژی بەڕێوەبەرایەتی حەج و عومرەی هەرێمی کوردستان بە ئاڤا نیوزی گوت: حەوتەمین حاجی کە ئەم ئێوارەیە کۆچی دوایی کردووە ناوی (سوعاد عەبدولرەحمان)ە، بە ڤیزای یەک ساڵە لە دەرەوەی ئاگاداری بەڕێوەبەرایەتی حەج و عومرە گەشتی کردبوو.

زانیاریی زیاتر: گوتەبێژی بەڕێوەبەرایەتی حەج و عومرە دەڵێت "چەند خانەوادەیەک ئاگاداری بەڕێوەبەرایەتی حەج و عومرەیان کردووە کە دوو ڕۆژە چەند کەسێکی خانەوادەیان بێ سۆراغن، هەموویان ئەوانە بوون کە بە ڤیزای یەک ساڵە گەشتیان کردووە".

باکگراوند: ئەمساڵ بەپێی پلانی بەڕێوەبەرایەتی حەج و عومرەی هەرێمی کوردستان، چوار هەزار و 685 کەس چوونەتە سعودیە بۆ بەجێهێنانی حەج، بەڵام مەزەندە دەکرێت بە هەزاران کەسی دیکە بە ڤیزای یەک ساڵە گەشتیان کردبێت.