سعودیە سەرکەوتنی وەرزی حەجی ئەمساڵی ڕاگەیاند

ئاڤا نیوز

 

سعودیە سەرکەوتنی وەرزی حەجی ئەمساڵ ڕادەگەیێنێت و کار لەسەر دانانی پلانێکیش بۆ وەرزی حەجی ساڵی داهاتوو دەکات، لە بەرامبەریشدا عێراق داوا لە سعودیە دەکات چاو بە پشکی عێراق بۆ ساڵی داهاتوو بخشێننەوە.

 

وێنە گەورەکە: بە مەبەستی بەجێهێنانی فەریزەی حەج، 39 هەزار و 591 حەجخواز لە هەرێمی کوردستان و عێراقەوە لە ڕێگەی ئاسمانی و وشکانییەوە گەیشتی وڵاتی سعودیەیان کردبوو.

 

ڕاگەیێنراوی فەرمی: سعود بن میشال بن عەبدولعەزیز، جێگری سەرۆکی لیژنەی ناوەندی حەج ڕاگەیاند: "بە خۆشحاڵییەوە سەرکەوتنی وەرزی حەجی ئەمساڵ 1445ی کۆچی ڕادەگەیەنم، پشتیوان بە خودا دەستبەجێ کار لەسەر دانانی ڕێکخستن و پلانێک دەکەین بۆ وەرزی حەجی ساڵی داهاتوو".

 

لەلایەکی دیکەوە: سەرۆکوەزیرانی عێراق لە میانی پێشوازیکردنی لە ماجد قەسەبی، وەزیری بازرگانی سعودیە و شاندی یاوەری لە بەغدا بە گرنگی زانی چاو بە پشکی عێراق بۆ وەرزی حەجی ساڵی داهاتوو بخشێنرێتەوە بە پشتبەستن بەو ڕێژەیەی دانیشتوان کە لە ئاماری نەتەوە یەکگرتووەکاندا پەسەندکراوە.

 

ئەمەش بزانە: دەستەی گشتیی ئاماری سعودیە ڕایگەیاند بۆ وەرزی حەجی ئەمساڵ، کۆی گشتیی حاجییان گەیشتووەتە نزیكەی دوو ملیۆن حاجی.