دەنگۆی مردنی چۆمسکی بڵاودەبێتەوە

ئاڤا نیوز

هەواڵی گیانلەدەستدانی نوام چۆمسکی، فەیلەسووف، زمانزان، چالاکوانی دژە شەڕ و ڕەخنەگری دیاری ئەمریکی تەمەن 95 ساڵ بڵاودەبێتەوە.

چیرۆکی سەرەکی: ئەمشەو لە تۆڕە کۆمەڵایەتییەکان و ژمارەیەک دەزگای میدیایی هەواڵی مردنی چۆمسکی بڵاوکرایەوە، بەڵام هەواڵەکە تاوەکو ئێستا بەفەرمی پستڕاست نەکراوەتەوە.

ئەوەی پێویستە بیزانیت: تێکچوونی باری تەندروستیی چۆمسکی بۆ حوزەیرانی ساڵی ڕابردوو دەگەڕێتەوە و لەو کاتەوە لەنێو خەڵک نەبینراوە، هەفتەیەک لەمەوبەریش تووشی جەڵتەی بوو،  بۆ وەرگرتنی چارەسەر لە نەخۆشخانەیەکی بەرازیل کە وڵاتی هاوژینەکەیەتی، خەوێنراوە.

ئەوەی لەبارەیەوە دەگوترێت: خزمێکی نزیکی کە ماوەیەک پێش ئێستا سەردانی کردووە، دەڵێت توانای قسەکردنی لەدەست داوە، ناتوانێت لەسەر قاچەکانی بووەستێت، چاوەکانی کراوەن وەک ئەوەی ببینێت.

ئەمەش بزانە: چۆمسکی لە ساڵی 2015ـەوە لە ساوپاوڵۆی بەرازیل دەژی،  ڕەخنەگرێکی دیاری سیاسەتی دەرەوەی ئەمریکا و سەرمایەدارییە، هەروەها لە چەندین بۆنەدا پشتیوانیی بۆ ڕەوایەتیی دۆزی کورد و فەڵەستین دەربڕیوە. خاوەنی زیاتر لە 150 پەرتووكە و زۆرترینیان لە بواری زمانەوانی و سیاسەتن.