هاوپەیمانیی نێودەوڵەتی مەشق و ڕاهێنانەکانی لە سووریا چڕ دەکاتەوە

ئاڤا نیوز

 

هێزەکانی هاوپەیمانی نێودەوڵەتی لە سووریا مەشق و ڕاهێنانەکانی بە چەکی قورس و دژە مووشەک چڕتر دەکاتەوە. 

 

وێنە گەورەکە: گرووپی چەکداری مقاوەمەی ئیسلامی لە عێراق کۆتاییهێنانی بەو وادەیە ڕاگەیاند کە دیاریکردبوو بۆ دەرچوونی هێزەکانی ئەمریکا لە عێراق، هێزەکانی هاوپەیمانی نێودەوڵەتیش مەشق و ڕاهێنانەکانیان لە سووریا چڕ دەکەنەوە. 

 

زانیاریی بەدەستهاتوو: هێزەکانی هاوپەیمانیی نێودەوڵەتی لەماوەی 24 کاتژمێری ڕابردوودا مەشق و ڕاهێنانە سەربازییەکانی لە بنکەی سەربازیی کێڵگەی نەوتی عومەر، کێڵگەی گازی کۆنیکۆ، کێڵگەی نەوتی جفرە لە پارێزگای دێرەزووری سووریا بە چەکی قورس و دژە مووشەک چڕ کردووەتەوە.

 

لەلایەکی دیکەوە: هێزەکانی سووریای دیموکراتیش بەدرێژایی ڕووباری فورات لە دەوروبەری دێرەزوور  بەرامبەر ئەو ناوچانەی دەکەونە ژێر کۆنترۆڵی سوپای سووریا و گرووپە چەکدارەکانی سەر بە ئێران لە ڕۆژهەڵاتی سووریا، چەکی قورس و خاڵی سەربازی داناوە و چەکی قەناسی تێدا جێگیر کردوون.

 

لێدوانی فەرمی: وسام عەگید، چالاکوان لە دێرەزوور بە سایتی عەرەبی ئەلجەدیدی ڕاگەیاندووە، ڕۆژی پێنجشەممەی ڕابردوو ئێران لە ڕێگەی دەروازی سنووری قائیمەوە لە عێراق کاروانێک هاوکاری سەربازی کە پێکهاتبوو لە 10 بارهەڵگر لەگەڵ 6 ئۆتۆمبێلی جۆری پیکئاپ گواستووەتەوە بۆ بنکە و سەربازگەکانی  بیابانەکانی ئەلبوکەمال و مەیادین، ئەو بارهەڵگرانە هاوکات لەگەڵ کاروانێکی حاجییانی عێراق چوونەتە ناو خاکی سووریا.