سوودانی بۆ وەزیری بەرگریی تورکیا: دەستبردن بۆ سەروەریمان ڕەتدەکەینەوە

ئاڤا دیجیتاڵ

سەرۆکوەزیرانی عێراق وەک هەڵوێستێک بەرامبەر هێرشە ئاسمانییە بەردەوامەکانی تورکیا بۆ سەر باشووری کوردستان بە وەزیری بەرگری تورکیای ڕاگەیاند: "دەستبردن بۆ سەروەریمان رەتیدەکەینەوە و نابێت خاکی عێراق ببێتە گۆڕەپانی یەکلاکردنەوەی ململانێکان".

 

چیرۆکی سەرەکی: بەیانی ئەمڕۆ سێشەممە 06-02-2024 یەشار گولەر، وەزیری بەرگریی تورکیا بە سەردانێک گەیشتە بەغدا، سەرەتا لەگەڵ سەرۆککۆمار کۆبووەوە، دواتر سەردانی سەرۆکوەزیران محەممەد شیاع سوودانی کرد.

 

لێدوانی فەرمی: بەپێی ڕاگەیێنراوی کۆبوونەوەکە کە حکومەتی عێراق بڵاویکردووەتەوە، چەندین پرسی پەیوەیست بە پەیوەندییەکانی نێوان هەردوولا باسکراون و  سوودانی بە یەشار گولەری ڕاگەیاندووە:

- ڕەتیدەکەینەوە دەست بۆ سەروەری عێراق ببرێت و ڕێوشوێن نەگیرێتەبەر بۆ یەکلاکردنەوەی ململانێکان لەنێو خاکی عێراق.

- رێگری لە بەکارهێنانی خاکی عێراق دەکەین بۆ هێرشکردنە سەر وڵاتانی دراوسێ.

- گرنگە ئاسایشی سووریا پارێزراو بێت، لەبەر پەیوەستبوونی بە ئاسایشی نەتەوەیی عێراق و تورکیا.

 

بۆچوونی بەرامبەر: لە کۆبوونەوەکەدا وەزیری بەرگریی تورکیا دوو پەیامی بە سەرۆکوەزیرانی عێراق ڕاگەیاندووە:

- ئارەزووی وڵاتەکەی نیشانداوە بۆ بەردەوامیدان بە پەیوەندییەکان و هاوکاریکردن لەگەڵ عێراق.

- رژدبوون لەسەر هەماهەنگی ئەمنیی هاوبەش لە بواری هەواڵگری و ڕووبەڕووبوونەوەی تیرۆر.

ئەمەش بزانە: بڕیارە هەر ئەمڕۆ یەشار گولەر سەردانی هەولێر بکات و لەگەڵ بەرپرسانی باڵای هەرێمی کوردستان کۆببێتەوە.