هەفتەی داهاتوو پرسی سەرۆکی ئەنجوومەنی نوێنەرانی عێراق یەکلایی دەبێتەوە

ئاڤادیجیتاڵ

 

چاوەڕواندەکرێت هەفتەی داهاتوو پرسی سەرۆکی ئەنجوومەنی نوێنەرانی عێراق یەکلایی بکرێتەوە، دوای ئەوەی پۆستی پارێزگاری بەغدا لە بەرژەوەندی دەوڵەتی یاسا کۆتاییهات.

 

وێنە گەورەکە: عەبدولموتەلیب عەلاوی رۆژی دووشەممە 06-02-2024 بە پارێزگاری نوێى بەغدا هەڵبژدرا کە ئەندامی هاوپەیمانی دەوڵەتی یاسای شیعەکانە. هەرچەندە هاوپەیمانی تەقەدوومی سووننەکان، بە سەرۆکایەتی محەممەد حەلبوسی، چاویان لە پۆستەکە بوو، بەڵام وەرگرتنی پۆستەکە لەلایەن شیعەکانەوە ڕێگەخۆش دەکات بۆ ئەوەی هاوپەیمانی تەقەدووم سەرۆکی ئەنجوومەنی نوێنەران بۆ خۆی یەکلایی بکاتەوە.

 

بۆچی گرنگە: زیاتر لە سێ مانگە پۆستی سەرۆکی ئەنجوومەنی نوێنەرانی عێراق چۆڵە، دوای ئەوەی دادگەی باڵای فیدڕاڵی سەرۆکایەتی و ئەندامێتی محەممەد حەلبوسی بەهۆی سکاڵای پەرلەمانتارێکەوە لەسەر "ساختەکردنی نووسراو" هەڵوەشاندەوە. 

 

لێدوانی فەرمی: "دوای یەکلایی بوونەوەی پۆستی پارێزگار لە بەشێکی پارێزگاکانی عێراق، لە هەفتەی داهاتوودا پرسی  سەرۆکی ئەنجوومەنی نوێنەرانیش یەکلایی دەبێتەوە"، د.ڤیان سەبری، سەرۆکی فراکسیۆنی پارتی لە ئەنجوومەنی نوێنەرانی عێراق ئەمەی بە ئاڤا گوت.

 

زانیاری زیاتر: لە کۆبوونەوەی ڕۆژی دووشەممەی ئەنجوومەنی پارێزگای بەغدا هاوپەیمانی تەقەدووم بایکۆتی دانیشتنەکەیان کرد و دواتر گەڕانەوە بۆ بەشداریکردن کە تێیدا عەبدولموتەلیب عەلاوی لە هاوپەیمانی دەوڵەتی یاسا بە 52 دەنگ بە پارێزگاری بەغدا هەڵبژێردرا.

 

پاشخان: لەدوای دوورخستنەوەی حەلبوسی تا ئێستا لایەنەکان نەیانتوانیووە لەسەر هەڵبژاردنی سەرۆکێکی نوێ ڕێکبکەون و مانگی ڕابردوو لە کۆبوونەوەیەکی ئەنجوومەنی نوێنەران هەڵبژاردنی سەرۆکێکی نوێ بەهۆی دروستبوونی گرژیی و ناکۆکییەوە شکستیهێنا.