كەنەدا لە هەرێمی كوردستان سەرمایەگوزاری دەکات

ئاڤا نیوز

مانگی نۆی ئەمساڵ ژمارەیەک سەرمایەگوزاری کەنەدی بۆ مەبەستی سەرمایەگوزاری دێتە هەڕێمی کوردستان، باڵیۆزی کەنەدا لە عێراق دەڵێت "ئاسانکاری دەکەن بۆ پێدانی ڤیزای وڵاتەکەیان بە هاونیشتیمانیانی هەرێمی کوردستان".

وێنەگەورەکە: باڵیۆزی کەنەدا لە بەغدا لەگەڵ سەرۆک و ئەندامانی ژووری بازرگانی هەولێر کۆبووەوە و چەندین پرسی هاوبەشیان تاوتوێ کرد.

لێدوانی فەرمی: کاتی بۆنکا، باڵیۆزی کەنەدا لە عێراق، بە ئاڤا نیوزی گوت:" کەنەدا لەبواری بازرگانی گرنگی بە هەرێمی کوردستان دەدات، هانی کۆمپانیا و بازرگانان دەدەین بەشداری کۆنفرانسە بازرگانییەکان بکەن لە کەنەدا، بەڵێن دەدەین کارێکی باشتر بکەین بۆ هاوکاریی کۆمپانیاکانی کوردستان".

زانیاریی زیاتر: "لەگەڵ ژووری بازرگانی هەولێر باسی ئەوەمان کرد ئاسانکاری بکرێت بۆ پێدانی ڤیزای کەنەدا بە هاونیشتیمانیان" کاتی بۆنکا ئەوەشی گوت.

لە لایەکی دیکەوە: گەیلان سەعید، سەرۆکی ژووری بازرگانی هەولێر بە ئاڤا نیوزی گوت:"باڵیۆزی کەنەدا لە بەغدا سەردانی کردین، بڕیارە مانگی نۆی ئەمساڵ ژمارەیەک سەرمایەگوزاری کەنەدی بێنە هەرێمی کوردستان بۆ کاری بازرگانی و وەبەرهێنان".

ئەوەی پێویستە بیزانیت: کەنەدا پەیوەندییەکی تووندوتۆڵی لەگەڵ عێراق و هەرێمی کوردستان هەیە، لە هاوکاری کردن بۆ ڕووبەڕووبوونەوەی تیرۆر لە ناوچەکەداهاوکاری هەردوولا دەکات.