شاندی هەرێمی کوردستان داوای پشتیوانی لە ئەمریکا دەکات

ئاڤا دیجیتاڵ

 

شاندێکی سەرۆکایەتی هەرێمی کوردستان دوو ڕۆژە لە ئەمریکان، لەکۆبوونەوەکانی ئەمڕۆیاندا، داوایان لە ئەمریکا کرد لە یارمەتیدان و پشتگیرییان بۆ هەرێمی کوردستان بەردەوام بن، هەروەها دوایین هەنگاوەکانی یەکخستنەوەی پێشمەرگە و پرۆسەی چاکسازییان لە وەزارەتی پێشمەرگەی حکومەتی هەرێمی کوردستان تاوتوێ کرد.

ئەوەی پێویستە بیزانیت: شاندی سەرۆکایەتیی هەرێمی کوردستان بە سەرۆکایەتیی فەوزی هەریری، سەرۆکی دیوانی سەرۆکایەتیی هەرێمی کوردستان و ئەندامیەتیی فەلاح مستەفا یاریدەدەری سەرۆکی هەرێمی کوردستان بۆ کاروباری سیاسەتی دەرەوە و نیاز ساڵح مستەفا بەرپرسی پەیوەندییەکانی دەرەوە و دیپلۆماسی لە سەرۆکایەتیی هەرێمی کوردستانە، بە ئامادبوونی تریفە عەزیز نوێنەری حکومەتی هەرێمی کوردستان، لە سەردانەکەیاندا بۆ ئەمریکا چەند دیدار و کۆبوونەوەیەک لەگەڵ بەرپرسانی ئەمریکا ئەنجام دەدەن.

چیرۆکی سەرەکی: ئەمڕۆ سێشەممە 2024/2/6 شاندی سەرۆکایەتیی هەرێمی کوردستان، لە کۆنگرێسی ئەمریکا لە واشنتن لەگەڵ ئەندامانی کۆنگرێس، مایکڵ ڕۆجەرز سەرۆکی لیژنەی سەربازی و ئادەم سمیس ئەندامی باڵای پارتی دیموکرات لە لیژنەی سەربازی و مایکڵ واڵتز ئەندامی لیژنەی سەربازی و کاروباری دەرەوە و هاوسەرۆکی گرووپی کوردی ـ ئەمریکی لە کۆنگرێس و جیم بێرد لە لیژنەی کاروباری دەرەوەی کۆنگرێس، چەند دیدارێکیان ئەنجامدا و دەربارەی پەیوەندییەکانی ئەمریکا لەگەڵ عێراق و هەرێمی کوردستان و دوایین پێشهاتەکانی ناوچەکە، بیروڕایان ئاڵوگۆڕ کرد.

زانیاری زیاتر: لە دیدارەکاندا شاندی سەرۆکایەتیی هەرێمی کوردستان، "سوپاس و پێزانینان بۆ پشتگیریی کۆنگرێسی ئەمریکا لە عێراق و هەرێمی کوردستان دووپات کردەوە و داوایان کرد لە یارمەتیدان و پشتگیرییان بۆ هەرێمی کوردستان بەردەوام بن، هەروەها دوایین هەنگاوەکانی یەکخستنەوەی پێشمەرگە و پرۆسەی چاکسازییان لە وەزارەتی پێشمەرگەی حکومەتی هەرێمی کوردستان تاوتوێ کرد و تیشکیان خستە سەر هەڕەشەکانی تیرۆر و مەترسییەکانی داعش لەسەر عێراق و ناوچەکە".