وەزیری دەرەوەی ئەڵمانیا بۆ ئێران: گرژییەکان کەم بکەنەوە

ئاڤا نیوز

وەزیری دەرەوەی ئەڵمانیا لە پەیوەنییەکی تەلەفۆنی لەگەڵ سەرپەرشتیاری وەزارەتی دەرەوەی ئێران، ڕایگەیاند" بە هەر نرخێک بووە، دەبێت پێش بە زیادبوونی گرژی و ئاڵۆزییەکانی ڕۆژهەڵاتی نێوەڕاست بگیرێت".

وێنە گەورەکە: ڕۆژهەڵاتی نێوەڕاست لە نێوان ئیسرائیل و گرووپ و ملیشیا بریکارەکانی کۆماری ئیسلامی بەرەو شەڕێکی پەڕگیر دەچێت و مەترسی تەقینەوەی دۆخەکە هەیە. ڕۆڵی ئێرانیش لە هێورکردنەوەی ئەم دۆخە کاریگەرە.

لێدوانی فەرمی: ئانالێنا بێربوک، وەزیری دەرەوەی ئەڵمانیا لە پەیوەنییەکی تەلەفۆنی لەگەڵ عەلی باقری کنی سەرپەرشتیاری وەزارەتی دەرەوەی ئێران، ڕایگەیاند: دەبێت تاران هاوکار بێت لە کەمکردنەوەی گرژییەکانی ڕۆژهەڵاتی نێوەڕاست.

زانیاریی زیاتر: ئۆفیسی کاروباری دەرەوەی ئەڵمانیا لە تۆڕی کۆمەڵایەتی (X)، بڵاوی کردەوە: ئانالێنا بێربوکی وەزیری دەرەوە لە پەیوەندییە تەلەفۆنییەکەی پێداگری کردووە "دەبێت بە هەر نرخێک بووە، پێش بە زیادبوونی گرژی و ئاڵۆزییەکانی ڕۆژهەڵاتی نێوەڕاست بگیررێت و ئێرانیش دەبێت لەمەدا ڕۆڵ و پشکی هەبێت".

باکگراوند: ڕۆژهەڵاتی نێوەڕاست لە دوای هێرشەکەی حەماس بۆ نێو خاکی ئیسرائیل و دواتر هێرشی ئیسرائیل بۆ سەر غەززە، ڕووبەڕووی ئاڵۆزی و گرژییەکی زۆر بووەتەوە، بە هەزاران کەس گیانیان لەدەست داوە.