یانەی زاخۆ هەوڵدەدات ناوی بچێتە كتێبی گینسەوە

ئاڤا نیوز

بەهۆی زۆری ژمارەی ئەو دەنگانەی لە ڕاپرسییەكەی فیفا بەدەستیهێناوە، یانەی زاخۆ هەوڵدەدات ناوی بچێتە كتێبی گینس بۆ ژمارە پێوانەییەكان.

وێنە گەورەكە: دەستنیشانكردنی هاندەرانی یانەی زاخۆ وەك باشترین هاندەر لەسەر ئاستی جیهان، دەسكەوتێكی ئاسایی نەبوو، بەڵكو بۆ بردنەوەی ئەو خەڵاتە، زیاتر لە دوو ملیۆن و 700 هەزار كەس لە بەرژەوەندیی یانەکە دەنگیان داوە كە بەپێی هەڵسەنگاندنەكانی فیفا دەكاتە 13 ملیۆن خاڵ، ئەوەش جاری یەكەمە لە مێژووی فیدراسیۆنی تۆپی پێی جیهان كە خەڵاتێكی فیفا بەو ژمارە زۆرەی دەنگە بەدەستبهێنرێت.

لێدوانی فەرمی: عەلی حاجی، بەرپرسی ڕاگەیاندنی یانەی زاخۆ بە ئاڤای ڕاگەیاند، ئێستا كار لەسەر هەنگاوێكی دیكەی گرنگ دەكەین كە بۆ ناوی زاخۆ و یانەكەمان گرنگە، ئەویش دوای بەدەستهێنانی زۆرترین ژمارەی دەنگ كە لە مێژووی فیفا تۆمار نەكرابوو، هەوڵدەدەین ناوی یانەی زاخۆ بچێتە کتێبی گینس بۆ ژمارە پێوانەییەكان.

ئەوەی پێویستە بیزانیت: ئاڤا ڕۆڵی كاریگەر و سەرەكیی هەبوو لە كۆكردنەوەی سەدان هەزار دەنگ لەماوەی هەڵمەتی كۆكردنەوەی پشتیوانی بۆ هاندەرانی یانەی زاخۆ لەڕێگەی هەڵدانی خێمە و پاسی گەڕۆك و پێدانی خەڵاتی گرانبەها بەڕێگەی تیروپشك بەو كەسانەی لە هەڵمەتەكە بەشداربوون.

زانیاریی زیاتر: لە ڕیزبەندەكەی فیفا بۆ دیاریكردنی باشترین هاندەر لەسەر ئاستی جیهان، زاخۆ بە كۆكردنەوەی زیاتر لە 13 ملیۆن خاڵ لە پلەی یەكەمە و ئەلیخاندرۆ سیگانۆتۆی ئەرژەنتینی بە كۆكردنەوەی سەرووی حەوت ملیۆن خاڵ لە پلەی دووەمە و مانۆلۆ ئێل بۆم دۆندۆ بە كۆكردنەوەی زیاتر لە سێ ملیۆن خاڵ لەپلەی سێیەمە.