ئاڤای خەڵک؛ مامۆستایان و قوتابیانی بنەڕەتی سێبەردان لە هەولێر لەبەر نەبوونی گەرمکەرەوە نەخۆش دەکەون

ئاڤا نیوز

بەهۆی نەبوونی نەوت و سۆپا، مامۆستا و قوتابیانی قوتابخانەی سێبەردانی بنەڕەتی لە هەولێر نەخۆش کەوتوون و ئاڤا بەدواداچوون بۆ گرفتی ئەو قوتابخانەیە دەکات.

زانیاریی بەدەستهاتوو: پۆلی یەکی سەرەتایی تاوەکو شەشی قوتابخانەی سێبەردانی بنەڕەتی لە هەولێر، نەوت و سۆپایان نییە، ڕۆژانە وانەکان لە پۆلە سارد و سڕەکان دەخوێنن،  ڕووناکی پۆلەکانیش کارناکات، قوتابیەکان دەڵێن: چاویان نابینێت و نازانن چۆن وانەکانیان بخوێنن، تەنانەت توالێتەکانیان پێویستی بە نۆژەنکردنەوەیە.

لێدوانی فەرمی: لوقمان سەعید، بەڕێوەبەری گشتی پەروەردەی هەولێر، بە ئاڤای وت:  "نەوتمان بەسەر قوتابخانەکانی سنووری پارێزگای هەولێر دابەش کردووە و ئەم کێشەیەمان چارەسەرکردووە، سەبارەت بە کەموکوڕیەکانی ئەو قوتابخانەیەش بە مەیدانی سەردانی دەکەم و کێشە و گرفتەکانیان بۆ چارەسەر دەکەین.

باکگراوند: قوتابخانەی سێبەردانی بنەڕەتی، لە ساڵی 1978 لە هەولێر دروست کراوە، بنمیچەکەی سەندویچ پەنەڵە و تا ئێستا نۆژەن نەکراوەتەوە.