یەکەم ئەنجامی بەرایی هەڵبژاردنی ئێران ڕاگەیێنرا

ئاڤا نیوز

 

ئەنجامی هەڵبژاردنی سەرۆکایەتیی کۆماری ئێران ڕاگەیێنرا و تاوەکو ئێستا هیچ کام لە بەربژێرەکان نەیانتوانیوە دەنگی پێویست [51%ـی دەنگەکان] بەدەستبهێنن، بۆیە ئەگەر هەیە هەڵبژاردنەکە بچێتە خولی دووەمەوە.

 

وێنە گەورەکە: ڕۆژی هەینی 28-06-2024 هەڵبژاردنی سەرۆکایەتیی کۆماری ئێران دەستیپێکرد، بڕیاربوو کاتژمێر 06:00ـی ئێوارەی هەمان ڕۆژ هەڵبژاردن کۆتایی بێت، بەڵام بەهۆی کەمیی بەشداریکردنی دەنگدەران سێ جار کاتەکەی درێژکرایەوە و تاوەکو لە کاتژمێر 12:00 شەو  بە کاتی تاران بنكەكانی دەنگدان داخران.

 

ژمارەکان وا دەڵێن: یەکەم ئەنجامی بەرایی هەڵبژاردنەکانی ئێران کە لەلایەن گوتەبێژی کۆمیسیۆنی ئەو وڵاتەوە ڕاگەیێنرا بەمشێوەیە:

 

لە کۆی 2 ملیۆن و 372 هەزار و 666 دەنگی جیاکراوە

 

• مەسعود پزیشکیان: 973 هەزار و 52 دەنگی بەدەستهێناوە

 

• سەعید جەلیلی: 963 هەزار و 615 دەنگی بەدەستهێناوە

 

• محەممەد باقر قالیباف: 341 هەزار و 56 دەنگی بەدەستهێناوە

 

• مستەفا پورمحەممەدی: 15 هەزار و 625 دەنگی بەدەستهێناوە

 

زانیاریی زیاتر: بەپێی هەواڵی ئاژانسی تەسنیمی ئێرانی، ڕێژەی بەشداریکردن لە دەنگدان 41% بووە.

 

هۆکارە زانراوەکان: بەهۆی ئەوەی هیچ کام لە بەربژێرەکان تاوەکو ئێستا نەیانتوانیوە زیاتر لە نیوەی دەنگەکان بەدەستبهێنن ئەگەر هەیە هەڵبژاردن بچێتە خولی دووەمەوە.

 

ئەوەی پێشبینی دەکرێت: ئەگەر ژمارەی دەنگی بەربژێرەکان بەمشێوەیە بوو و هیچ کام لە بەربژێرەکان نەیانتوانی 51%ـی دەنگەکان بەدەستبهێنن، ئەوا هەڵبژاردن دەچێتە خولی دووەمەوە و دوای دوو هەفتەی دیکە، جارێکی دیکە هەڵبژاردن لەنێوان ئەو دوو بەربژێرانەی کە زۆرترین دەنگ بەدەست دەهێنن بەڕێوەدەچێت.