دیندار زێباری: هیچ پەنابەرێک بە ناچاری نەگەڕێنراوەتەوە سووریا

ئاڤا نیوز

ڕێکخەری ڕاسپاردە نێودەوڵەتییەکان ئەو دەنگۆیانە ڕەتدەکاتەوە، کە باس لە گەڕاندنەوەی بەزۆری پەنابەران دەکەن بۆ سووریا.

وێنە گەورەکە: لە چەند ڕۆژی ڕابردوودا ڕاپۆرتێک بڵاوکرایەوە کە عێراق پەنابەرە سوورییەکانی بەزۆر گەڕاندووەتەوە وڵاتەکەیان، گوایە لە هەرێمی کوردستانیش ئەو حاڵەتە ڕوویداوە.

لێدوانی فەرمی: دیندار زێباری، ڕێکخەری ڕاسپاردە نیودەوڵەتییەکانی حکومەتی هەرێمی کوردستان بە ئاڤا نیوزی گوت:" هیچ کەسێک بەزۆر نەگەڕێندراوەتەوە سووریا و هیچ بڕیارێكی حکومی لەم شێوەیەش لە ئارادا نییە، نەک تەنیا پەنابەران بەڵکو هیچ ئاوارەیەکی ناوەڕاست و خوارووی عێراق لە هەرێمی کوردستان بە ناچارکردن ڕەوانە نەکراونەتەوە".

زانیاریی زیاتر: لەبارەی مافی نیشتەجێبوونیشەوە دیندار زێباری گوتی: ئەو سەردانیکەرانەی لە ڕێگەی ڤیزەوە سەردانی هەرێمی کوردستان دەکەن بەگوێرەی یاسا و ڕێنماییانەییەکانی کۆمیسیۆنی باڵای پەنابەرانی سەر بە نەتەوە یەکگرتووەکان مامەڵەیان لەگەڵدا دەکرێت و کوردستانیش پابەندە بەهەمان ڕێنماییەکان.

ئەوەی پێویستە بیزانیت: زیاتر لە 250 هەزار پەنابەری سووری لە هەرێمی کوردستان دا هەن کە لە نێو کەمپ و دەرەوەی کەمپەکان نیشتەجێن.