نرخی 100 دۆلار گەیشتە 149 هەزار؛ هۆکارەکەی چییە؟

ئاڤا نیوز

لە بازاڕەکانی هەرێمی کوردستان و عێراق بەهای دینار بەرامبە دۆلار لە دابەزینە و کاتژمێر 1:05 خولەکی دوانیوەڕۆی ئەمڕۆ 100 دۆلار گەیشتە 149 هەزار دینار، ئەمەش بۆ دوو هۆکار دەگەڕێنرێتەوە.

وێنە گەورەکە: چەند هەفتەیەکە بەهای دینار بەرامبەر دۆلار بەردەوام بەرزونزمی دەکات، لەو ماوەیەدا بەگشتی بەهای هەر 100 دۆلارێک چوار بۆ پێنج هەزار دینار گۆڕانکاری بەسەردا هاتووە.

لێدوانی فەرمی: کەیفی خۆشناو، گوتەبێژی بازاڕی دۆلارفرۆشانی هەولێر بە ئاڤا نیوزی گوت: هۆکاری دابەزینی بەهای دینار بەرامبەر دۆلار کەمی دۆلارە لە بازاڕەکانی عێراق، لەلایەکی دیکەش کەمی خستەڕووی دۆلارە لە لایەن بانکی ناوەندی.

زانیاریی زیاتر: ئەمڕۆ چوارشەممە بانکی ناوەندی 160 ملیۆن دۆلاری بە  حەواڵە و تەنیا 14 ملیۆن دۆلاریشی بە کاش خستە بازاڕەوە.

لەلایەکی دیکەوە: لە ماوەکانی ڕابردوودا حکومەتی عێراق 197  کۆمپانیای سزادا و پێدانی دۆلاری بە نرخی بانکی ناوەندی لێ قەدەغە کردن، ئەمەش کاریگەری لەسەر بەرزبوونەوەی نرخی دۆلار هەبووە.

خاڵە نەرێنییەکان: ئەو 197 کۆمپانیایە کە بەشێکیان هی هەرێمی کوردستانن، بەناچاری بۆ کڕینی دۆلار ڕوو لە بازاڕی ڕەش دەکەن، ئەمەش دەبێتە هۆی کەمبوونەوەی دۆلار لە بازاڕدا.