یەکەمین نەخۆشیی مەلاریا له عێراق تۆمار دەکرێت

ئاڤا نیوز

 

سەرچاوەیەکی پزیشکی تۆمارکردنی یەکەم حاڵەتی تووشبوون بە نەخۆشیی مەلاریای لە دوای 15 ساڵ لە عێراق ڕاگەیاند، تووشبووەکە کەسێکی بیانییە و هاتووەتە عێراق.

 

وێنە گەورەکە: نەخۆشیی مەلاریا لە کەشوهەوای گەرمدا باوترە، ساڵانە نزیکەی 290 ملیۆن کەس تووشی ئەو نەخۆشییە دەبن و زیاتر لە 400 هەزار کەس بەهۆی نەخۆشییەکەوە دەمرن.

 

زانیاریی بەدەستهاتوو: سەرچاوەیەکی پزیشکی ئەوەی بۆ میدیای عێراق ئاشکرا کردووە کە "ئەو تووشبووە بیانییە و لە کۆمپانیاکانی پاککردنەوەی ماڵاندا کار دەکات؛ ئەمە یەکەم حاڵەتی تووشبوونە بە مەلاریایە لە عێراق دوای ئەوەی بە فەرمی ڕاگەیێنرا کە هیچ حاڵەتێکی تووشبوون بە مەلاریا بوونی نییە،

 

کاریگەری و لێکەوتەکان: تیمە پزیشکییەکان پشکنین بۆ هەموو ئەو شوێنانە دەکەن کە کەسە تووشبووەکە سەردانی کردووە.

 

ئەمەش بزانە: نەخۆشیی مەلاریا بەھۆی جۆرێک لە مشەخۆرەوە تووشی مرۆڤ دەبێت و بەهۆی مێیەی مێشوولە بۆ کەسێکی دیکە دەگوازرێتەوە، کەسی تووشبوو هەست بە نەخۆشییەکی زۆر دەکات لەگەڵ تایەکی بەرز و ساردبوونەوە و لەرزین.