پەیامی گوتەبێژی فەرماندەی هێزە چەکدارەکانی عێراق لەبارەی هێرشەکەی شەوی ڕابردووی ئەمریکا

ئاڤا دیجیتاڵ

 

گوتەبێژی فەرماندەی هێزە چەکدارەکانی عێراق سەبارەت بە هێرشەکانی شەوی ڕابردووی ئەمریکا پەیامێکی بڵاوکردەوە و دەڵێت، ئەم هێرشانە زیاتر لە پێشوو حکومەتی عێراق هاندەدات بۆ کۆتاییهێنان بە ئەرکی هاوپەیمانان. 

 

وێنە گەورەکە: شەوی ڕابردوو، ئەمریکا بە درۆن ئۆتۆمبێلێکی لە بەغدا کردە ئامانج و دوو فەرماندەی کەتائیبی حیزبوڵڵای عێراق بەناوەکانی " ئەبو باقر ساعیدی و ئەرکان عەلیاوی" کوژران. 

 

لێدوانی فەرمی: لیوا یەحیا ڕەسووڵ، گوتەبێژی فەرماندەی هێزە چەکدارەکانی عێراق پەیامێکی سەبارەت بە هێرشەکەی شەوی ڕابردووی بەغدا بڵاوکردەوە:-

 

• هێزە ئەمریکییەکان چەندین جار و نابەرپرسانە، ئەو کردەوانە ئەنجام دەدەن کە لەوانەیە لێکتێگەیشتنەکان و دەستپێکردنی گفتوگۆی دووقۆڵی تێکبدات، بە دەستپێکردنی هێرشێکی ئاسمانی لە ناوەڕاستی گەڕەکێکی نیشتەجێبوون لە بەغدای پایتەخت، بەشێوەیەک گرنگی بە ژیانی خەڵکی سڤیل و یاسا نێودەوڵەتییەکان نەدات.

 

• بەم شێوەیە هەڕەشە لە ئاشتی مەدەنی دەکات، سەروەری عێراق پێشێل دەکات، ژیانی خەڵک و گەلەکەمان سووک دەکات و دەیخاتە مەترسییەوە و ئەوەی لەوە مەترسیدارترە ئەوەیە کە هاوپەیمانی نێودەوڵەتی بە تەواوی لەو هۆکار و مەبەستانە تێدەپەڕێنێت کە لەسەر خاکی ئێمە بۆی دروست بووە.

 

• ئەم ڕێبازە زیاتر لە پێشوو حکومەتی عێراق هاندەدات بۆ کۆتاییهێنان بە ئەرکی هاوپەیمانیی نێودەوڵەتی، کە بۆتە هۆکاری ناسەقامگیری بۆ عێراق و هەڕەشەی ڕاکێشانی عێراق بۆ ناو بازنەی ململانێکان، هێزە چەکدارەکانی ئێمەش ناتوانن خۆیان بپارێزن و جێبەجێی نەکەن و ئەرکە دەستوورییەکانیان بۆ پاراستنی ئاسایشی عێراقییەکان و خاکی عێراق لە هەموو هەڕەشەکان هەیە.

 

باکگراوند: لەوکاتەوەی جەنگی حەماس و ئیسرائیل دەستیپێکردووە، گرژی و ململانێکان لە ڕۆژهەڵاتی ناوەڕاست پەرەی سەندووە و پەلی کێشاوە بۆ عێراقیش، هێرشی شەوی ڕابردووی ئەمریکا لە چوارچێوەی ئەو گرژی و ململانێیانەیە.