%53ـی خەڵکی تورکیا داوای هەڵبژاردنی پێشوەختە دەکەن

ئاڤا نیوز

دەنگۆی ئەنجامدانی هەڵبژاردنی پێشوەختە لە تورکیا بڵاوبووەتەوە، بەپێی ڕاپرسییەکی دەزگای ئاریا زیاتر لە نیوەی خەڵکی ئەو وڵاتە لەگەڵ هەڵبژاردنی پێشوەختەدان، جەهەپەش بە نهێنی ئامادەکاری بۆ ئەو هەڵبژاردنە دەکات.

 

وێنە گەورەکە: جەهەپە سوود لە سەرکەوتنی لە هەڵبژاردنی 31ـی ئادار بە دەرفەت دەزانێت و هەوڵدەدات هەڵبژاردنی پێشوەختە بکرێت و کورسیی سەرۆکایەتیی کۆمار بباتەوە. 

 

زانیاریی تایبەت: ئاڤا نیوز زانیویەتی جەهەپە، کە پارتی ڕکابەر و ئۆپۆزسیۆنی دەسەڵاتی تورکیایە، بە نهێنی ئامادەکاری بۆ کۆکردنەوەی دەنگی لایەنەکان و خەڵکی تورکیا دەکات بۆ هەڵبژاردنی پێشوەختە. 

 

لێدوانی فەرمی: ئۆزگور کەرەبات، ئەندامی ئەنجوومەنی نوێنەرانی تورکیا لە فراکسیۆنی جەهەپە بە ئاڤا نیوزی گوت: ئێمە لەگەڵ ڕای گەلین، خەڵک داوای هەڵبژاردنی پێشوەختە بکات، ئێمە دەیکەین.

 

لەلایەکی دیکەوە: لە بەدواداچوونێکی ئاڤا نیوز بۆ ئەم پرسە، سەرۆک و ئەندامانی جەهەپە بە ئاشکرا هەڵوێستی خۆیان لەسەر ئەم پرسە دەرنابڕێن لەبەر ئەوەی نایانەوێت بە ئاشکرا دژایەتیی ئەردۆغان و ئاکپارتی بکەن.