زانکۆ و پەیمانگەکانی کوردستان خرانە نێو لیستی دامەزراندنی گرێبەست لە پارێزگای نەینەوا

ئاڤا نیوز

 

ناوی زانکۆ دانپێدانراوەکانی کوردستان زیاد کرا بۆ ئەو لیستەی کە حکومەتی عێراق بۆ دامەزراندنی 17 هەزار دەرچووی زانکۆ و پەیمانگەکان بەشێوەی گرێبەست بڵاوی کردووەتەوە.

 

وێنە گەورەکە: وەزارەتی خوێندنی باڵای حکومەتی عێراق بڕیاریداوە بۆ دەرچووانی پارێزگای نەینەوا بەشێوەی گرێبەست ساڵانە کۆمەڵێک دەرچوو دابمەزرێنێت.

 

لێدوانی فەرمی: شێروان دووبەردانی، ئەندامی ئەنجومەنی نوێنەرانی عێراق بە ئاڤا نیوزی ڕاگەیاند: ئەمساڵ لەسەر داوای (عەبدولرەحیم شەمەری، ئەندامی ئەنجومەنی نوێنەران لە لیستی حەشدی وەتەنی) ناوی زانکۆکانی هەرێمی کوردستان لەو لینکە دەرهێنرا بوو، بەڵام لەڕێگەی پارێزگاری موسڵ داوامان بەرزکردەوە بۆ وەزارەتی خوێندنی باڵای عێراق، ئەمڕۆ ڕەزامەندی گەڕایەوە.

 

خاڵی ئەرێنی: شێروان دووبەردانی دەڵێت، هەر دەرچوویەکی زانکۆ ئەگەر کورد، مەسیحی، شەبەک یان ئێزدی بێت، بڕوانامەی زانکۆ و پەیمانگەکانی هەرێمی کوردستانی هەبێت، دەتوانن لەو لیستە کێبڕکێی دامەزراندن بکەن.

 

ئەوەی پێویستە بیزانیت: هەر کەسێک فۆرمەکە پڕبکاتەوە، دەبێت کارتی زانیاری پارێزگای نەینەوا بێت.