پێکهاتە و لایەنەکان لە کەرکووک بەنهێنی گفتوگۆ دەکەن

ئاڤا نیوز

گفتوگۆی نێوان لایەنە سیاسییەکانی کورد و عەرەب و تورکمان لە کەرکووک، بۆ یەکلاکردنەوەی پۆستەکانی پارێزگاکە بە نهێنی بەردەوامە، تاوەکو ئێستاش نەگەیشتوونەتە ڕێککەوتن.

وێنە گەورەکە: دوای تێپەڕبوونی نزیکەی حەوت مانگ بەسەر بەڕێوەچوونی هەڵبژاردنی ئەنجوومەنی پارێزگاکانی عێراق، ڕۆژی 11-7-2024 کۆبوونەوەی ئەنجوومەنی پارێزگای کەرکووک بەڕێوەچوو، بڕیار درا لە ماوەی مانگێکدا سەرجەم پۆستەکانی پارێزگاکە یەکلابکرێنەوە.

لێدوانی فەرمی: حەسەن مەجید، سەرۆکی فراکسیۆنی پارتی دیموکراتی کوردستان لە ئەنجوومەنی پارێزگای کەرکووک، بە ئاڤا نیوزی گوت: تاوەکو ئێستا لایەنە سیاسییەکان سەبارەت بە پۆستەکانی پارێزگاکە و بەتایبەت پۆستی پارێزگار نەگەیشتوونەتە ڕێککەوتن، بەڵام گفتوگۆکان دوور لە چاوی میدیاکان بەردەوامن.

زانیاریی زیاتر: تاوەکو لایەنە سیاسییەکان نەگەنە ڕێککەوتن، کۆبوونەوەی داهاتووی ئەنجوومەنی پارێزگای کەرکووک ناکرێت، تەنیا یەک مانگیش بۆ ئەو مەبەستە دیاری کراوە.

ئەوەی پێویستە بیزانیت: گفتوگۆی نێوان لایەنە سیاسییەکانی بۆ ئەوەیە، ئاخۆ پۆستی پارێزگاری کەرکووک هەر چوار ساڵەکە بۆ نەتەوەیەک بێت، یاخود ساڵ بە ساڵ بێت یانیش هەر دوو ساڵ جارێک بۆ نەتەوەیەک بێت؟