ساڵێک و شەش مانگە مامەڵەی پسوولەی خۆراکی هەزاران خێزان وەستاوە

ئاڤا نیوز

 

ساڵێک و شەش مانگە بەهۆی گۆڕینی پسوولەی خۆراک بۆ ئەلیکترۆنی، مامەڵەی دەرکردنی پسوولەی خۆراک هاونیشتمانیان لە پارێزگاکانی هەولێر، سلێمانی و هەڵەبجە گرفتی بۆ دروستبووە و وەستاوە. 

 

وێنە گەورەکە: وەزارەتی بازرگانیی حکومەتی عێراق دەیەوێت پسوولەی خۆراکی سەرجەم پارێزگاکانی عێراق بکاتە ئەلیکترۆنی، بەڵام بەهۆی هەڵوەشانەوەی گرێبەستی ئەو وەزارەتە لەگەڵ کۆمپانیایەکی ئەڵمانی بەتەواوی کارەکانی ئەو پڕۆسەیە وەستاوە.

 

لێدوانی فەرمی: سیامەند قادر، بەڕێوەبەری گشتیی پسوولەی خۆراکی هەولێر بە ئاڤا نیوزی ڕاگەیاند: ڕۆژانە هاونیشتمانییەکی زۆر سەردانی بەڕێوەبەرایەتییەکە دەکەن بۆ دروستکردنی پسوولەی خۆراک، بەڵام بەهۆی وەستانی پڕۆسەکە ناتوانرێت هیچیان بۆ بکرێت، لە سێ پارێزگای هەرێمی کوردستان کێشە بۆ مامەڵەی هەزاران خێزان دروست بووە.

 

لەلایەکی دیکەوە: سیامەند قادر دەڵێت: بەشێک لە وەزارەتەکان بۆ پڕکردنەوەی فۆرمی وەرگرتنی زەوی داوای پسولەی خۆراک لە فەرمانبەران دەکەن، ئێمە لەبری ئەوە پشتگیرییان پێ دەدەین.

 
ئەوەی پێویستە بیزانیت: ساڵی 2023 پڕۆسەی بە ئەلیکترۆنیکردنی پسوولەی خۆراک دەستیپێکرد، پسوولەی خۆراکی پارێزگاکانی نەجەف و دهۆک کران بە ئەلیکترۆنی، بەڵام دواتر وەستا.

 

باکگراوند: لە سنووری پارێزگای هەولێر 495 هەزار و 198 خێزان لە بەڕێوەبەرایەتیی پسوولەی خۆراک ناویان تۆمارکراوە کە دەکاتە نزیکەی دوو ملیۆن هاونیشتمانی.