ئەو کۆمپانیایانەی حەجخوازیان بە نایاسایی بردووەتە سعودیە سڕ دەکرێن

ئاڤا نیوز

وەزارەتی ئەوقاف و کاروباری ئایینی حکومەتی هەرێمی کوردستان، چەند بڕیارێک سەبارەت بەو کۆمپانیایانەی کە بەڤیزای ساڵی و گەشتیاری حەجخوازیان  بردووە بۆ حەج دەردەکات.

وێنە گەورەکە: ئەمساڵ 30 حاجیی هەرێمی کوردستان لە سعودیە گیانیان لەدەستداوە، کە  29 حاجییان ئەوانە بوون بە ڤیزای گەشتیاریی چووبوونە ئەو وڵاتە.

لێدوانی فەرمی: کاروان ستوونی، گوتەبێژی بەرێوەبەرایەتی حەج و عومرەی هەرێمی کوردستان بە ئاڤا نیوزی گوت:"لێکۆڵینەوە لەسەر بردنی هاووڵاتیانی هەرێمی کوردستان بۆ سعوودیە دەکرێت، بەتایبەت ئەو کۆمپانیایانەی لەدەرەوەی ڕێنمایی وەزارەتی ئەوقاف و کاروباری ئایینی، بوونە هۆی مردن و بێ سەروشوێن بوونی چەند حەجخوازێک".

ئەوەی پێویستە بیزانیت: نوێنەری وەزارەتی ناوخۆ و داواکاری گشتی، وەک یەکەم هەنگاو بڕیاریاندا  ئەو کۆمپانیایانەی  کە سکاڵایان لەسەر تۆمارکراوەو بەڤیزای ساڵی و ڤیزای گەشتیاری و ڤیزا جۆراوجۆرەکان حەجخوازیان بردووە بۆ سعوودیە، تاوەکو لێکۆڵینەوەکان کۆتایی دێت، سڕ دەکرێن.

زانیاریی زیاتر: هەر هاووڵاتییەک سکاڵای لەسەر هەر کەس و کۆمپانیاییەک هەیە، تاوەکو 10 ڕۆژی دیکە دەتوانن سکاڵا تۆمار بکەن. کاروان ستوونی وای گوت.