دادگەی فیدراڵی تاوتوێی پرسی زەوی جووتیارانی کورد لە کەرکووک دەکات

ئاڤا نیوز  

 

دادگەی فیدراڵیی عێراق تاتوێی دوو سکاڵای ژمارەیەک جووتیار و خاوەن زەوییەکانی پارێزگای کەرکووک دەکات، کە بەهۆی ئەو دوو بڕیارەوە زەوییەکانیان خراوەتە سەر وەزارەتەکانی کشتوکاڵ و دارایی عێراق.

وێنە گەورەکە: بەپێی خشتەی دانیشتنەکانی دادگەی فیدراڵی، بڕیارە ڕۆژی یەکشەممە 21-7-2024 دادگەکە لەسەر پێنج سکاڵا کۆببێتەوە، دوو سکاڵایان لەلایەن جووتیاران و خاوەنە ڕەسەنەکانی بەشێک لە زەوییەکانی پارێزگای کەرکووک کراوە.

هۆکارە زانراوەکان: سکاڵای یەکەمیان لەلایەن ژمارەیەک جووتیارەوە لەسەر سەرۆکی پەرلەمان تۆمارکراوە، داوا دەکەن دادگە بڕیاری نادەستووری بوونی بڕیاری ئەنجوومەنی سەرکردایەتیی هەڵوەشاوەی شۆڕش ژمارە 949ی ساڵی 1977 و یاسای یەکخستنی پۆلێنی زەوییەکانی دەوڵەت ژمارە 53ی ساڵی 1976 و تۆمارکردنیان بەناوی وەزارەتەکانی دارایی و کشتوکاڵ بدات.

 

زانیاریی زیاتر: سکاڵای دووەمیش بە هەمان شێوەی لەلایەن ژمارەیەک جووتیارەوە لەسەر سەرۆکی پەرلەمان کراوە، داوا دەکەن بڕیاری ئەنجوومەنی سەرکردایەتیی هەڵوەشاوەی شۆڕش ژمارە 824ـی 16-8- 1976 بە نادەستووری بزانێت، بڕیارەکە تایبەتە بە تاپۆکردنی ژمارەیەک زەوی لە سنووری ناحیەی داقووق.