ئاڤا ئاماری وەرگرتنی گەنمی هەر سێ پارێزگاکە بڵاودەکاتەوە

ئاڤا نیوز

ئەگەرچی تا ئەمشەو پرۆسەی وەرگرتنی گەنم بەردەوام دەبێت، بەڵام بەگوێرەی دواین داتای وەزارەتی بازرگانی ڕێژەی وەرگرتنی گەنم لەزۆربەی پارێزگاکان %97 بووە.

وێنە گەورەکە: ئەمساڵ پرۆسەی بەبازاڕکردنی گەنمی جووتیاران لە هەرێمی کوردستان لەڕۆژی 6-6-2024 دەستیپێکردو پشکی ئەمساڵ 700 هەزار تۆن بوو.

لێدوانی فەرمی: سەروەر کەمال هاواری، بریکاری وەزیری بازرگانی حکومەتی هەرێمی کوردستان بە ئاڤا نیوزی گوت: ئەمڕۆ کۆتا ڕۆژی وەرگرتنی گەنمی جووتیارانە و تا ئێستا 675 هەزار و 371 تۆن وەرگیراوە و هێشتا زیاتر لە 24 هەزار و 488 تۆن ماوە وەربگیرێت.

زانیاریی زیاتر: لەپارێزگای هەولێر لە دوو سایلۆی بنکەی کۆیە، زیاتر لە 221 هەزار تۆن گەنم وەرگیراوە، هێشتا شەش هەزار و 785 تۆن گەنم ماوە وەربگیرێت. لە پارێزگای سلێمانی زیاتر لە 273 هەزار تۆن وەرگیراوە، هێشتا زیاتر لە نۆ هەزار تۆن ماوە وەربگیرێت، لە پارێزگای دهۆک 180 هەزار و 774 تۆن وەرگیراوە، هێشتا هەشت هەزار و 365 تۆن ماوە وەربگیرێت. سەروەر کەمال وای گوت.