لایەنە سیاسییەكانی کورد لە كەركووک كۆدەبنەوە

ئاڤا نیوز

بڕیارە سبەی یەكشەممە پارت و لایەنە سیاسییەکانی کورد لە کەرکووک بۆ تاوتوێكردنی چەند پرسێك كۆببنەوە.

وێنە گەورەكە: لە کۆتایی ساڵی ڕابردوو هەڵبژاردنی ئەنجوومەنی پارێزگاکانی عێراق کراوە و تاوەکو ئێستا لایەنەکانی پارێزگای کەرکووک لەسەر دیاریکردنی کەسێک بۆ پۆستی پارێزگار ڕێکنەکەوتوون.

لێدوانی فەرمی: حەسەن مەجید، سەرۆكی فراكسیۆنی پارتی لە ئەنجوومەنی پارێزگای كەركووك بە ئاڤا نیوزی گوت: "کۆبوونەوەکە لە بارەگای مەڵبەندی کۆمەڵی دادگەریی بە بەشداریی سەرجەم هێز و لایەنەکان بە پارتی و یەكێتییەوە لەسەر ئاستی کەسی یەکەمی سەرجەم پارتەكان لە کەرکووک دەکرێت".

هۆکارە زانراوەکان: ئامانجی کۆبوونەوەکە نوێکردنەوە و بەھێزكردنەوەی پەیوەندیی لایەنەکان و گەڕانەوەیە بۆ پێش ڕووداوەکانی 16ـی ئۆكتۆبەری ساڵی 2017.

لەلایەكی دیكەوە: ڕێباز سابر، بەرپرسی مەڵبەندی كۆمەڵی دادگەری لە کەرکووک بە ئاڤا نیوزی گوت،" كۆبوونەوەکە كاتژمێر 04:30 خولەکی ئێوارە دەكرێت و یەکێک لە بابەتەکانی كۆبوونەوەکە دیراسەكردنی پڕۆسەی سەرژمێرییە".

ئەوەی پێویستە بیزانیت: پرسی سەرژمێریکردن یەکێکی دیکەیە لە پرسەکانی کەرکووک و بڕیارە لە مانگی 10ـی ئەمساڵدا، بەبێ دیاریکردنی نەتەوە بکرێت، ئەوەش نیگەرانی پێکهاتەی کوردی لە شارەکە لێکەوتووەتەوە.