ڕاگەیێنراوی کۆبوونەوەی لایەنە کوردییەکانی کەرکووک؛ هاوهەڵوێستن

ئاڤا نیوز 

 

لە دوای نیوەڕۆی ئەمڕۆ، سەرجەم لایەنە سیاسییە کوردییەکانی کەرکووک لە بارەگەی کۆمەڵی دادگەریی کوردستان لە شارەکە کۆبوونەوە و لەسەر سێ خاڵ هاوهەڵوێست بوون.

 

وێنە گەورەکە: دوای هەڵبژاردنی ئەنجوومەنی پارێزگای کەرکووک لە کۆتایی ساڵی ڕابردوو، چەند جارێک لایەنە کوردییەکانی کەرکووک کۆبوونەتەوە، بەڵام لەسەر ناوێک بۆ پارێزگاری کەرکووک ڕێکنەکەوتوون.

 

لێدوانی فەرمی: مەڵبەندی کەرکووکی کۆمەڵی دادگەریی کوردستان ڕاگەیێنراوێکی سەبارەت بە کۆبوونەوەکە بڵاوکردەوە و تیایدا داوا لە لایەنە براوەکانی هەڵبژاردن دەکرێت بەزووترین کات حکومەتی خۆجێیی پێکبهێنرێت، هاوکات حزبەکان کۆک بوون پارێزگاری کەرکووک پشکی کوردە.

 

لەلایەکی دیکەوە: ڕەوەند مەلا مەحموود، لێپرسراوی مەڵبەندی دووی یەکێتیی نیشتیمانیی کوردستان لە لێدوانێکی ڕۆژنامەوانی ڕایگەیاند: "ئەم کۆبوونەوەیە بۆ باسکردنی هەندێک کێشەی نێو شاری کەرکووک و هاوهەڵوێست بوونی حزبەکان بوو".

 

زانیاریی زیاتر: "جارێ هیچ ناوێک پێشکەش نەکراوە، بەڵام پۆستی پارێزگار مافی یەکێتییە". سەبارەت بە پێشکەشکردنی ناوێک بۆ پارێزگاری کەرکووک، ڕەوەند مەلا مەحموود ئاماژەی بەمەدا.