دادگەی فیدراڵیی عێراق لەسەر سکاڵای پێکهاتەکان کۆدەبێتەوە

ئاڤا نیوز 

 

پێکهاتەکانی کوردستان داوا لە دادگەی فیدراڵیی عێراق دەکەن ماددە دووی سیستمی تۆمارکردنی لیستی بەربژێران و پەسەندکردنی بۆ هەڵبژاردنی پەرلەمانی کوردستان ژمارە 7ـی ساڵی 2024 بە نادەستووری بزانێت.

 

وێنە گەورەکە: ڕۆژی دووشەممە 22-07-2024 دادگەی فیدراڵیی عێراق لەسەر حەوت سکاڵا کۆدەبێتەوە کە بە جیا لەلایەن پێکهاتەکانەوە دژی سەرۆکوەزیرانی عێراق، سەرۆکی دەستەی کۆمیسیاران لە کۆمیسیۆنی باڵای سەربەخۆی هەڵبژاردنەکان و وەزیری پلاندانانی عێراق لە دادگەی فیدراڵی تۆمار کراوە.

 

ڕاگەیێنراوی فەرمی: بەپێی خشتەکانی کۆبوونەوەی دادگەی فیدراڵی تاوتوێی حەوت سکاڵا دەکرێت، سەرجەم سکاڵاکان لە دادگە ئەوەیە بڕیاری نادەستووریبوونی ماددەی دووی سیستمی تۆمارکردنی لیستی بەربژێران بدات، کە بەهۆیەوە کوردستان دابەشی سەر چوار بازنەی هەڵبژاردن و 100 کورسیی پەرلەمان کراوە.

 

زانیاریی زیاتر: داواکاریی پێکهاتەکان جیایە، لەوانە: تەرخانکردنی پێنج کورسی بۆ پێکهاتەی مەسیحی لە کلدان و ئاشووری و سریانی و کورسییەک بۆ ئەرمەن، تەرخانکردنی کورسی بۆ پێکهاتەی ئەرمەن، تورکمان بە شێوەی یەک بازنە، پێنج کورسی بۆ کۆتای تورکمان.

 

ئەوەی پێویستە بیزانیت: دوای سکاڵای پێکهاتەکان لەسەر ماددەکە، دەستەی دادوەریی هەڵبژاردنەکان لە مانگی ئازاری ئەمساڵ بڕیاری گەڕانەوەی پێنج کورسیی پێکهاتەکانی دا لە هەولێر کورسییەک بۆ مەسیحی و کورسییەک بۆ تورکمان، هەروەها لە سلێمانی کورسییەک بۆ مەسیحی و کورسییەک بۆ تورکمان، لە دهۆکیش یەک کورسی بۆ ئەرمەنەکان.