حکومەتی عێراق دوو ملیار دینار بۆ 289 خانەوادەی کەرکووک خەرج دەکات

ئاڤانیوز

دەستەی داواكانی موڵكداریی عێراق لە هەرێمی كوردستان، زياتر لە دوو ملیار دینار بەسەر ئەو كەسانە دابەش دەكات كە زیانلێكه‌وتووی دەستی رژێمی بەعسن. 
 
لێدوانی فەرمی: فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بە ئاڤا نیوزی ڕاگەیاند: جارێكی دیكە بڕێك پارە بەسەر زەرەرمەندانی دەستی ڕژێمی بەعس دابەش دەكرێت، ئەم پارەیە ئەو كەسانە دەگرێتەوە كە پێشتر  داوای قەرەبووکردنەوەیان پێشکەش کردووە.

بۆچی گرنگە: لە پرۆسەی ئەمجارە 289 زیانمەندی ده‌ستی ڕژێمی بەعس لە کەرکووک سوودمەند دەبن و بڕی پارەكەش زياتر له دوو ملیار دینارە.

زانیاری زیاتر: چەندین ساڵە پرۆسەی قەرەبووکردنی زیانلێکەوتووانی دەستی ڕژێمی بەعس هەبووە و بەردەوامیش دەبێت، بەڵام تەنیا ئەو كەسانە دەگرێتەوە داواکاریيان پێشكەش كردووه و به بڕيارى ئەنجوومەنی نوێنەران هیچ داواکارییەکی نوێ وەرناگیرێت.

باکگراوند: جگە لەم 289 خانەوادەیە، لە دوو مانگی ڕابردوودا 850 خانەوادەی دیکە بە بڕی 8 ملیار و 50 ملیۆن دینار قه‌ره‌بوو کراونەتەوە.